“Chiquita” şirkəti minlərlə işçisini ixtisar edib
Bakı, 23 may, AZƏRTAC
Beynəlxalq bazarı bananla təchiz edən aparıcı şirkətlərdən biri olan “Chiquita” Panamada tətil edən işçilərə qarşı sərt tədbirlər görür.
AZƏRTAC xəbər verir ki, şirkət bir aya yaxındır tətil edən minlərlə əməkdaşının işdən çıxarıldığını açıqlayıb. Təsərrüfatlarda və əməliyyat mərkəzlərində keçirilən tətil azı 75 milyon dollar iqtisadi itki ilə nəticələnib.
Məlumata görə, ölkənin qərbindəki Bokas-del-Toro əyalətində 4900 işçi ixtisara məruz qalıb. Şirkətin Panamada ümumilikdə 7 minə yaxın işçisi var.
Panama Prezidenti Xose Raul Mulino mətbuat konfransında şirkəti müdafiə edib və hökumətinin banan sektorunu tənzimləmək niyyətində olduğunu bildirib. O, həmçinin ölkədə heç bir sektorun banan sənayesi qədər iş təklif etmədiyinə diqqət çəkib.
Aprelin 28-dən başlayaraq banan sahəsinin işçiləri müxtəlif həmkarlar ittifaqlarının çağırışı ilə pensiya islahatına qarşı tətilə başlayıblar. Onlar, eyni zamanda, müəllimlər, yerli əhali və tikinti işçiləri ilə birlikdə yerli hakimiyyətlə Vaşinqton arasında imzalanan və Panama kanalında ABŞ-ın hərbi iştirakının artırılmasına imkan verən təhlükəsizlik sazişinə etiraz edirlər.
Bölmənin digər xəbərləri
