ELM VƏ TƏHSİL
CİNS ATLARIN GENOFONDUNU QORUMAQ ÜÇÜN TƏDBİRLƏR GÖRÜLÜR
Bioloji müxtəlifliyə dair respublikada həyata keçirilən tədbirlər sırasında sadalanan atların genofondunun qorunub saxlanması da diqqət mərkəzindədir. Mütəxəssislərin fikrincə, Azərbaycanın yerli genofondu sayılan atlar üç tipə bölünür: - Kiçik Qafqazın dağətəyi bölgələrində yayılmış ortaboylu “Qarabağ” və “Dilboz” cinsindən olan atları əhatə edən Kiçik Qafqaz tipi; Böyük Qafqaz dağ bölgəsində yayılmış kiçikboylu Quba atlarının və Şəki-Zaqatala zonasının dağ atlarının daxil olduğu Böyük Qafqaz tipi; Kür-Araz ovalığında yayılmaqla “Şirvan” və “Qarabağ” atlarının cırlaşmış qalıqlarından ibarət Düzən tipi.
Ən qədim dağ minik at cinsinin - Azərbaycan atları içərisində görkəmli yer tutan “Qarabağ” atlarının genofondunun qorunub saxlanması və inkişaf etdirilməsi məqsədi ilə hələ 1946-cı ildən düşünülmüş seleksiya-damazlıq işləri aparılır. Bundan əlavə, respublikamıza ötən 50 il ərzində başqa ölkələrdən “təmizqanlı” minik atları - “İngilis”, “Ərəb”, “Terek”, “Türkmən “, “Budyonnı”, “Traken” və poni atları da gətirilmişdir.