“Coker” filmi Venesiya kinofestivalında ajiotaja səbəb olub
Bakı, 31 avqust, AZƏRTAC
Hoakin Feniksin rol aldığı “Coker” filmi Venesiya kinofestivalında ajiotaja və uzun növbələrə səbəb olub.
AZƏRTAC xarici KİV-lərə istinadla xəbər verir ki, rejissor Todd Fillipsin ekran əsəri 76-cı Venesiya kinofestivalının əsas müsabiqəsində təqdim edilib.
Avqustun 31-də səhər saatlarında Lido adasında jurnalistlər və kino sənayesi əməkdaşları üçün filmin nümayişi keçirilib. Böyük ajiotaj səbəbindən tamaşaçılar filmin başlamasına uzun müddət qalmış saatlarla növbə tutmaq məcburiyyətində qalıb. Auditoriya iki saatlıq filmin finalını alqışlarla qarşılayıb.
“Coker” filmi Betmenin düşməni, ruhi problemlərdən, ailəsindəki qarışıqlıqdan əziyyət çəkən və cəmiyyətin üz döndərdiyi Artur Flekdən bəhs edir. Filmdə, həmçinin Robert De Niro, Zazi Bits, Frensis Konroy və digər aktyorlar da rol alıb.
Ekran əsərinin rəsmi premyerası bu gün axşam Venesiya kinofestivalının əsas meydanı olan Kino Sarayının Böyük Zalında olacaq.
Bölmənin digər xəbərləri
