Con DiPirro: Vaşinqton sammiti çərçivəsində əhəmiyyətli irəliləyişin əldə edildiyini görürük
Bakı, 18 noyabr, Aytac Haqverdiyeva, AZƏRTAC
Vaşinqton sammiti çərçivəsində əhəmiyyətli irəliləyişin əldə edildiyini görürük. Bu sammit Azərbaycan və Ermənistanın sülh prosesində irəli getmək üçün səmimi siyasi iradəyə malik olduğunu nümayiş etdirib və məhz bu iradə yeni dinamikanın formalaşmasına səbəb olacaq. Ancaq bu tip proseslərdə, xüsusilə sülh müqavilələri müzakirə olunarkən qarşıda həmişə görüləsi işlər qalır. Lakin əsas məsələ odur ki, artıq ciddi siyasi iradə mövcuddur. Hər bir prosesin başlanğıc nöqtəsi məhz budur.
Bu sözləri AZƏRTAC-a məxsusi müsahibəsində Mərkəzi Asiya-Qafqaz İnstitutunun (CACI) Avrasiya üzrə baş elmi işçisi Con DiPirro deyib.
O qeyd edib ki, prosesdə ikinci mühüm amil iqtisadi imkanlardır. Hər iki ölkənin bir-biri ilə əməkdaşlıqdan əldə edə biləcəyi faydalar böyükdür. “Təklif edə biləcəkləri xidmətlər, qarşılıqlı tamamlayıcı sahələr və regionda artan qarşılıqlı iqtisadi maraqlar bu əməkdaşlığı daha real və praktik edir. Nəqliyyat əlaqələri, xüsusilə “Tramp marşrutu”nun yaradılması hər iki tərəf üçün ciddi üstünlüklər vəd edir. Bu səbəbdən mən gələcəyə optimist yanaşıram. Hər zaman olduğu kimi, ehtiyatlı optimizmdən çıxış edirəm, lakin hesab edirəm ki, real imkanlar, siyasi iradə və iqtisadi mənafelər sülh prosesini irəli aparmaq üçün kifayət qədər güclüdür”, - deyə Con DiPirro əlavə edib.
O, Azərbaycanın Mərkəzi Asiya Dövlət Başçılarının Məşvərət Görüşünə tamhüquqlu iştirakçı kimi qoşulmasını isə uğurlu addım olaraq qiymətləndirib: “Son illərdə bir sıra sahələrdə əlaqələrin ardıcıl şəkildə dərinləşdiyini müşahidə edirik. Azərbaycan, Özbəkistan, Qırğızıstan, Qazaxıstan və Tacikistan arasındakı təhlükəsizlik əməkdaşlığı qarşılıqlı mübadilələr baxımından davamlı şəkildə irəliləyib. Eyni zamanda, iqtisadi münasibətlərdə artan dinamika mövcuddur. Həmçinin Mərkəzi Asiya ölkələri və Azərbaycan arasında daha geniş və sistemli şəkildə əməkdaşlıq görülür. Bu, xüsusilə bir neçə gün əvvəl elan edilən və gələcəkdə 5+1 modelindən fərqli olaraq tamhüquqlu “altılıq platforması” yaradılacağı xəbəri fonunda daha real görünür. Bu addım göstərir ki, bütün tərəflər birgə fəaliyyət göstərmək, qarşılıqlı əlaqələri daha da dərinləşdirmək və perspektivli Orta Dəhlizin inkişafını irəli aparmaq üçün ciddi iradə nümayiş etdirirlər”.
Bölmənin digər xəbərləri
