Cüdo üzrə klublararası Azərbaycan kubokunun seçmə mərhələsi yarışları keçirilmişdir
Bakı, 28 yanvar (AZƏRTAC). Bakı İdman Sarayında ilk dəfə olaraq cüdo üzrə klublararası Azərbaycan kubokunun seçmə mərhələsi yarışları keçirilmişdir.
Azərbaycan Cüdo Federasiyasından AZƏRTAC-a bildirmişlər ki, yarışda 15 komanda dörd qrupda mübarizə aparmışdır. On çəki dərəcəsi üzrə keçirilən yarışda hər komanda 10 idmançı (3 gənc və 7 böyük) ilə çıxış etmişdir.
Bakı şəhəri və regionlardan çıxış edən klublar öz aralarında dövrə yarışlarına çıxacaq səkkiz kollektivi müəyyənləşdirmişdir.
Maraqlı idman mübarizəsi şəraitində keçən yarışda “Kanokan TT”, KANO, “Sərhədçi”, “Attila Bakı”, “Lokomotiv Bakı”, “Qəbələ”, “Judo 2012” və “Neftçi” komandaları növbəti mərhələyə adlamışlar.
Qeyd edək ki, yarışın növbəti mərhələsi 7 dövrədən ibarət olacaqdır. Bu mərhələnin yarışları martın 3-də, 10-da, iyulun 7-də, sentyabrın 29-da, oktyabrın 6-da, 13-də, 20-də keçiriləcəkdir. “Dördlər finalı” isə noyabrın 10-da təşkil olunacaqdır.
Bölmənin digər xəbərləri
