CÜDO ÜZRƏ MƏŞQÇİ ƏHMƏDDİN RƏCƏBLİNİN ÇIXIŞI
Dəyərli xanımlar və cənablar!
Hörmətli Prezident, mən çox şadam ki, qızıl kimi vaxtınızı ayıraraq paralimpiyaçıları qəbul edirsiniz. Ona görə də paralimpiyaçılar, bütün sumqayıtlılar, o cümlədən Rəcəblilər ailəsi adından Sizə ən səmimi təşəkkürümü bildirirəm.
Biz ölkədə gedən böyük dəyişikliyi hiss edirik. Afinaya yolasalma mərasimində bizimlə səmimi görüşünüz idmançılarımızı ruhlandırdı. Afina şəhərində olarkən, ilk addımımızı atarkən inanın, həqiqətən elə bilirdik biz Azərbaycandayıq. Elə gözəl əhval-ruhiyyə yaradılmışdı ki, bizi hər yerdə səmimi qarşılayırdılar. Bizim əsas nailiyyətimiz yarışlardakı qələbəmiz oldu. Biz çox sevinirik ki, Azərbaycan xalqına layiq olan qələbələrlə qayıtdıq.
Uzun illərdir cüdo ilə məşğul olan adam kimi açığını deyirəm, heç vaxt belə fərəh hissi keçirməmişəm. Ona görə ki, müstəqil Azərbaycanımızı belə bir yüksək yarışda təmsil edirdim. Sizin də qeyd etdiyiniz kimi, belə bir idmançının yetişməsində əməyim olubdur. Bizim fikrimiz-zikrimiz ancaq yarışda qələbə qazanaraq, Vətənə üzüağ qayıtmaq olub. Allahıma şükür edirəm ki, biz bunu edə bildik. Cənab Prezident, biz bunu Sizin sayənizdə etdik. Çünki Sizin Azərbaycanda yaratdığınız mühit, bu gözəl şərait buna imkan veribdir.
Qafqazda ən sakit, sabit yer kimi Azərbaycanı tanıyırlar. Adi məşqçilər arasında gedən söhbətlərdə də bu xüsusi vurğulanırdı. Biz bilirik ki, mərhum Prezidentimiz Heydər Əliyevin qoyduğu yolu Siz davam etdirirsiniz. Allah ona qəni-qəni rəhmət etsin! Qoy ruhu şad olsun ki, Azərbaycana yenə qələbə medalları gətirilibdir.
Hörmətli Prezidentimiz, bir neçə gündən sonra Sizin dövlət başçısı seçilməyinizin bir ili tamam olur. Buradan xalqımıza demək istəyirəm ki, görülən işlər göz qabağındadır. Bir ilin içində bir belə iş görmək, Azərbaycanın iqtisadiyyatının dirçəldilməsi, ucqar kəndlərdə təsərrüfatların yaradılması, yeni iş yerlərinin açılması, idmançılara göstərilən qayğı – hamısı göz qabağındadır. Ona görə bir il bundan öncə bütün xalq kimi, bizim ailəmiz də etdiyi seçimə görə heç də peşman deyildir. Allah Sizi qorusun. Arzu edirəm ki, xalqımızın şən günlərini bir yerdə keçirək. Çox sağ olun.
Diqqətinizə görə minnətdaram.
Bölmənin digər xəbərləri
