DAĞISTAN UNİVERSİTETİNDƏ TARİXÇİLƏRİN KONFRANSI KEÇİRİLMİŞDİR

18.11.2006 [19:22]
Çap et
A⁺ A^-

AZƏRTAC “Dağıstan” agentliyinə istinadla xəbər verir ki, Dağıstan Dövlət Universitetinin (DDU) 75-ci ildönümünə həsr olunmuş “Qafqaz, Yaxın və Orta Şərq dünya siyasətində: tarix və müasirlik” mövzusunda Beynəlxalq elmi-praktik konfrans keçirilmişdir.

Konfransda Moskva, Azərbaycan və Mordva alimləri iştirak etmişlər.

DDU-nun tarix fakültəsinin dekanı, professor B.Bulatov, elmi işlər üzrə prorektor, professor N.Aşurbəyov və başqaları çıxışlarında mövzunun aktuallığını vurğulamışlar.

Ümumi iclasda səslənən məruzələrdə Qafqazın coğrafi siyasətinə, Azərbaycan xanlıqları tarixinə, Krım müharibəsinə və orta əsrlərdə Dağıstanın Yaxın Şərq ölkələri ilə mədəni əlaqələrinə toxunulmuşdur.

Sonra konfrans işini “Qafqaz, Yaxın və Orta Şərq xalqlarının coğrafi siyasət və qarşılıqlı münasibətlər problemləri” və “Qafqaz, Yaxın və Orta Şərq xalqlarının iqtisadi və mədəni əlaqələri” bölmələrində davam etdirmişdir.

Konfrans iştirakçıları Dağıstanın tarix elmi qarşısında duran fundamental vəzifələrinə dair müzakirələr aparmış, əməli tövsiyələr qəbul etmişlər.