DEKABRIN 2-DƏN 11-DƏK AZƏRBAYCANDA VI BEYNƏLXALQ ELM OLİMPİADASI KEÇİRİLƏCƏKDİR
Bakı, 30 noyabr (AZƏRTAC). Dekabrın 2-dən 11-dək Azərbaycanda Heydər Əliyev Fondu, İJSO (International Junior Science Olympiad), Azərbaycan Milli Elmlər Akademiyasının dəstəyi ilə VI Beynəlxalq Elm Olimpiadası keçiriləcəkdir. Tədbirə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri Mehriban xanım Əliyeva himayədarlıq edir.
Gənclər və İdman Nazirliyindən bildirmişlər ki, 15 yaşlı yeniyetmələr arasında fizika, kimya və biologiya fənləri üzrə keçiriləcək olimpiadada iştirak etmək üçün 49 ölkədən 600-dən artıq tələbə və onların müəllimləri müraciət etmişdir.
Olimpiadaya hazırlıq məqsədi ilə artıq Elm Komitəsi, eyni zamanda, olimpiadanın keçirilməsinə məsul qurumların nümayəndələrinin iştirakı ilə işçi qrupu yaradılmışdır. Olimpiadanın Elmi Komitəsinə görkəmli alim, Azərbaycan Diplomatik Akademiyasının rektoru Hafiz Paşayev, Təşkilat Komitəsinə isə gənclər və idman naziri Azad Rəhimov rəhbərlik edirlər.
Olimpiadanın işçi qərargahı bu ilin mart ayından fəaliyyətə başlamışdır.
Veriləcək suallar milli mütəxəssislərin iştirakı ilə hazırlanmışdır.
Ölkəmizə gələcək tələbələr, onların müəllimləri , müşahidəçilər üçün Azərbaycan tarixi və mədəniyyəti ilə tanışlıq üçün xüsusi proqramlar hazırlanmışdır.
Qonaqların müşahidəsi üçün isə 100-dək könüllü müəyyənləşdirilmiş və onlar üçün əlavə hazırlıq təlimləri keçirilmişdir.
Bölmənin digər xəbərləri
