Dələduzluq yolu ilə məhkumların qohumlarından pul alan şəxs barədə cinayət işi başlanılıb
Bakı, 1 iyun, AZƏRTAC
Azərbaycan Respublikasının Prezidenti İlham Əliyev tərəfindən humanizm və ədalət prinsiplərinə əsaslanaraq reallaşdırılan uğurlu dövlət strategiyasının əyani təzahürü kimi ölkəmizdə çoxsaylı əfv sərəncamları imzalanıb, minlərlə məhkum olunmuş şəxsin cəzadan azad edilərək cəmiyyətə reinteqrasiya olunması təmin edilib. Həyata keçirilən mütərəqqi siyasətin məntiqi davamı kimi, bu il Azərbaycan Xalq Cümhuriyyətinin yaradılmasının 100 illik yubileyi münasibətilə növbəti əfv Sərəncamının imzalanması bir daha humanizm ideyalarının təbliği, şəxsiyyətə inam və hörmətin bariz nümunəsi olmaqla, ölkə ictimaiyyəti tərəfindən təqdirəlayiq hal kimi qəbul olunub.
Azərbaycan Respublikasının Prezidenti yanında Əfv Məsələləri Komissiyasının və Azərbaycan Respublikası Baş Prokurorluğunun AZƏRTAC-a daxil olan birgə məlumatında bildirilib ki, bununla belə, şəffaf prosedurlar əsasında həyata keçirilən humanizm siyasətindən sui-istifadə halları vətəndaşların hüquqlarının pozulması və dövlətin bu sahədəki fəaliyyətinə ictimai etimadın sarsılması təhlükəsi yaratdığından belə qanunsuz hərəkətlərə qarşı ən ciddi mübarizə tədbirləri davam etdirilməkdədir.
Belə ki, məhkum edilmiş şəxslərin və onların yaxın qohumlarının etibarından sui-istifadə etmə və ya aldatma yolu ilə onlara məxsus müxtəlif məbləğlərdə pul vəsaitlərini ələ keçirmiş şəxs barəsində Azərbaycan Respublikasının Prezidenti yanında Əfv Məsələləri Komissiyasından Baş Prokurorluğa daxil olmuş çoxsaylı vətəndaş müraciətləri əsasında Baş Prokuror yanında Korrupsiyaya Qarşı Mübarizə Baş İdarəsində cinayət işi başlanıb.
Cinayət işinin istintaqı zamanı məlum olub ki, Allahverdiyev Vüqar İsax oğlu Azərbaycan Respublikası Ədliyyə Nazirliyinin Penitensiar Xidmətinin 7 və 13 saylı cəzaçəkmə müəssisələrində saxlanıldığı müddətdə telefonla danışıq hüququndan istifadə etməsi üçün yaradılmış şəraitdən yararlanaraq özü ilə birlikdə cəza çəkən ayrı-ayrı şəxslərin yaxın qohumlarına zəng edərək həmin məhkumların adlarının əfv olunan şəxslər siyahısına saldıracağını bildirib. V.Allahverdiyevin naməlum şəxslər vasitəsilə Quliyeva Kəmalə İnqilab qızından 3000 manat, Məmmədov Firdovsi Tanrıverdi oğlundan 2500 manat, Həsənov Namiq Məmməd oğlundan 3000 manat tələb edib almasına və eyni niyyətlə Məlikova İradə Vahab qızından tələb etdiyi 1500 manat pulu ələ keçirməyə cəhd etməsinə, habelə cinayət işi üzrə həmin xüsusatlar araşdırılarkən müəyyən edilmiş digər qanunsuz hərəkətləri törətməsinə şübhələr üçün əsaslar olduğundan, ona Cinayət Məcəlləsinin 178.2.2-ci (təkrar törədilməklə dələduzluq), 178.2.4-cü (xeyli miqdarda ziyan vurmaqla dələduzluq), 310-cu (Vəzifəli şəxsin səlahiyyətlərini mənimsəmə) və 32.4, 312.2-ci (Vəzifəli şəxs tərəfindən bilə-bilə qanunsuz hərəkətlər (hərəkətsizlik) etməyə görə ona rüşvət verməyə və ya təkrar rüşvət verməyə təhrik etmə) maddələri ilə ittiham elan edilib və cinayət işi baxılması üçün Bakı Ağır Cinayətlər Məhkəməsinə göndərilib.
Bölmənin digər xəbərləri
