SİYASƏT
Deputat: Vətən müharibəsində qazanılan Zəfərin davamı olan quruculuq işlərini də uğurla başa çatdıracağıq
![Deputat: Vətən müharibəsində qazanılan Zəfərin davamı olan quruculuq işlərini də uğurla başa çatdıracağıq](/files/2021/2/1200x630/1629384255158691881_1200x630.jpg)
Bakı, 19 avqust, AZƏRTAC
Tarixən bütün müharibələr torpaq üstündə olub və belə müharibələr bəzən illərlə davam edib. Ermənistanın Azərbaycana qarşı ərazi iddiası da elan edilmədən başlayan müharibəyə səbəb oldu. İşğalı qeyri-rəsmi dəstəkləyən, əslində, demokratik dövlət imicini itirmiş bəzi dövlətlərin siyasi, iqtisadi və hərbi yardımından bəhrələnən Ermənistan Azərbaycanın 20 faiz ərazisini işğal etmişdi.
Prezident İlham Əliyev Azərbaycanın 30 ilə yaxın müddətdə münaqişənin sülh yolu ilə həll edilməsinə tərəfdar olduğunu bildirirdi. Ermənistan isə bölgədə status-kvonu saxlamaq niyyəti ilə danışıqlardan yayınırdı. Belə bir vəziyyətdə sülh danışıqlarını sonacan aparmaq mümkün olmazdı.
Ermənistan silahlı birləşmələri irimiqyaslı təxribat törətmək məqsədilə 2016-cı ilin aprelində müxtəlif təyinatlı atıcı silahlardan istifadə etməklə Azərbaycanın ərazilərinə hücum etdi. Azərbaycan Ordusunun qarşısında duruş gətirə bilməyən düşmən geri çəkilməyə məcbur oldu. Təcavüzkar və işğalçı siyasət yürüdən Ermənistanın ötən ilin iyulunda Tovuz rayonu istiqamətindən dövlət sərhədlərimizi pozmaq cəhdi də baş tutmadı. Həddini aşan düşmənin cavabı verilməli idi və verildi.
AZƏRTAC xəbər verir ki, bu fikirləri Milli Məclisin deputatı Səbinə Xasayeva bildirib.
Deputat xatırladıb ki, 2016-cı ilin Aprel döyüşləri Azərbaycan Ordusunun torpaqlarını işğaldan azad etməyə qadir olduğunu təsdiqlədi. Düşmən buna əhəmiyyət verməyərək, öz işğalçılıq niyyətini davam etdirirdi. BMT Təhlükəsizlik Şurasının qətnamələrini yerinə yetirməyən, ATƏT-in Minsk qrupuna daxil olan dövlətlərin tövsiyələrinə qulaq asmayan işğalçı Ermənistan həddini aşaraq Azərbaycana qarşı yeni ərazi iddiaları ilə çıxış edirdi. Düşmən, yeni ərazilər əldə etmək üçün müharibə arzusunda idi. Beləliklə, düşmən 2020-ci ilin sentyabr ayının 27-də bütün istiqamətlərdən ölkəmizə qarşı hücum əməliyyatına başladı.
“Azərbaycan Prezidenti İlham Əliyev xalqa müraciətində Ermənistan silahlı qüvvələrinin bir neçə istiqamətdə müxtəlif növ silahlardan, o cümlədən ağır artilleriyadan istifadə edərək yaşayış məntəqələrimizi, hərbi mövqelərimizi atəşə tutduğunu bildirdi. Dövlətimizin başçısı bu müharibədə bizim haqlı olduğumuzu diqqətə çatdırdı: “Biz haqlıyıq, biz öz torpağımızda vuruşuruq, öz torpağımızda şəhidlər veririk. Bizim savaşımız müqəddəs savaşdır!”. Bu sözlər həm də dünya ictimaiyyətinə, dünya dövlətlərinə Vətən müharibəsinin mahiyyətini açıqladı.
Vətən müharibəsində xalq Azərbaycan Ordusunun arxasında qətiyyətlə dayandı, xalqın böyük mənəvi dəstəyini hiss edən Ordumuz daha qətiyyətlə döyüşdü. Ermənistanın illərlə düzəltdiyi, möhkəmləndiyi, təkmilləşdirdiyi müdafiə sədlərini, mühəndis-istehkam qurğuları sistemini darmadağın etdi. Qısa müddətdə ilkin mövqe qələbələri qazanıldı. Bu qələbələr Ordumuzun şəxsi heyətinin qələbə ruhunu daha da yüksəltdi. Çarəsiz müdafiə döyüşləri aparan düşmən döyüşə-döyüşə geri çəkilirdi, bəzi mövqelərdə döyüşməyə cəsarət etmirdi”, - deyə S.Xasayeva vurğulayıb.
Deputat qeyd edib ki, bu günlərdə Prezident İlham Əliyev Türkiyənin “CNN Türk” televiziya kanalına verdiyi müsahibəsində mühüm mesajlar verdi. Dövlətimizin başçısı müsahibəsində işğaldan azad olunmuş ərazilərdə bütün infrastrukturun Ermənistan tərəfindən dağıdıldığını və talan edildiyini, Azərbaycan hökumətinin Qarabağın və Şərqi Zəngəzurun bərpası, yenidən qurulması ilə bağlı gərgin iş apardığını bir daha dünya ictimaiyyətinin diqqətinə çatdırdı. Mesaj verildi ki, Ermənistan hər zaman işğalçı ölkə kimi dağıdıcı siyasət yürüdüb. Azərbaycan isə əksinə, hər zaman sülhün tərəfdarı olub və ölkəmizin yeganə məqsədi regionda təhlükəsizliyin təmin olunması və işğaldan azad edilmiş ərazilərdə bərpa və yenidənqurma işlərinin başa çatdırılmasıdır: “Ermənistan üçtərəfli Bəyanatın müddəalarını pozaraq sülh müqaviləsinin imzalanmasından boyun qaçırır. Bu isə onun xeyrinə deyil. Ermənistan onsuz da işğalçılıq siyasəti nəticəsində Azərbaycana külli miqdarda ziyan vurub və özü də çox şey itirib. Zəngəzur dəhlizi başda olmaqla kommunikasiyaların açılması, sərhədlərin demarkasiyası və delimitasiyası prosesinə və digər məsələlərin həllinə maneə törədən yeganə səbəb Ermənistanın məsuliyyətsizliyidir”.
S.Xasayeva vurğulayıb ki, Rusiya üçtərəfli Bəyanatın bütün müddəalarının Ermənistan tərəfindən yerinə yetirilməsinə nəzarət etməlidir. Azərbaycanın qonşusu və Ermənistanın yaxın müttəfiqi kimi Rusiyanın bu bölgədə xüsusi rolu nəzərə alınaraq sülhün bərqərar olunması üçün səylərini daha da artırması mütləqdir. Ermənistan cəmiyyəti müharibənin nəticələrini artıq qəbul edib və bununla barışıb. Bu ölkənin gələcəyi üçün qonşularla dinc və yanaşı yaşamaqdan başqa çarəsi yoxdur.
“Azərbaycan 44 günlük Vətən müharibəsi ilə bütün dünyaya səs saldı. Biz möhtəşəm Qələbə qazandıq, öz gücümüzə ərazilərimizi azad etdik. Biz Vətən müharibəsində qazanılan Zəfərin davamı olan quruculuq işlərini də uğurla başa çatdıracağıq”, - deyən deputat fikirlərini yekunlaşdırıb.