Dilçi alimlərimiz elmi fəaliyyətlərini sosial təcrid şəraitində də davam etdirirlər
Bakı, 27 aprel, AZƏRTAC
AMEA Nəsimi adına Dilçilik İnstitutunun əməkdaşları apardıqları tədqiqatların ümumi nəticələrini məqalə, monoqrafiya və konfrans materiallarında əks etdirirlər. Xüsusi karantin rejimindən əvvəl müxtəlif qaynaqlara, kitabxana və fondlara müraciət edən alimlərimiz, gənc tədqiqatçılarımız ölkədə tətbiq edilən xüsusi karantin rejimində sosial təcrid qaydalarına uyğun olaraq tədqiqatlarını ev şəraitində davam etdirirlər. Bu barədə AZƏRTAC-a Dilçilik İnstitutundan məlumat verilib.
Bildirilib ki, karantin dövründə alim və tədqiqatçıların mütəmadi olaraq müraciət etdikləri AMEA-nın Mərkəzi Elmi Kitabxanası da öz iş rejimini onlayn davam etdirir. Kitabxananın direktoru Sevil Zülfüqarovanın rəhbərliyi ilə mövcud şərtlərdə veb-səhifə və onlayn xidmət vasitəsilə yaratdığı imkanlardan, Dilçilik İnstitutunun “Azərbaycan dilinin informasiya bazası” sistemində və elektron kitabxanasında təqdim olunan qaynaqlardan, Milli Kitabxana və dünya kitabxanalarının virtual rejimdə təqdim etdikləri resurslardan, onlayn xidmətlərdən, nəşrlərin PDF və e-pub formatlarından geniş istifadə edərək elmi-tədqiqat işləri, məqalələri üzərində işləyərək elmi fəaliyyətlərində fasilənin yaranmasına imkan vermirlər. İnstitutun əməkdaşı, dosent Şəkər Orucova “Kökü kəsilən türk dilləri” mövzusunda araşdırmalarını davam etdirib, bu silsilədən növbəti məqaləsini bitirib. Dosent Aynel Məşədiyeva ingilis dilində məqaləsini bitirib “Terminologiya məsələləri” jurnalına təqdim edib. Filologiya üzrə fəlsəfə doktoru Günel Mirzəyeva “Müstəqillik dövrü Azərbaycan şeirinin dil və üslub xüsusiyyətləri” monoqrafiyasının redaktə işlərini bitirərək çapa hazırlayıb. Dosent Şəbnəm Həsənli-Qəribova “Orta əsrlər türk dillərində elmi üslub” mövzusunda tədqiqlərini davam etdirir, bu sahə ilə bağlı orta əsrlərdə tərtib olunan təbabət elminə dair qaynaqların terminoloji sistemi haqqında məqalə hazırlayıb. Filologiya üzrə fəlsəfə doktoru Turan Hüseynova doktorant Elnurə Hüseynovanın “Türk dillərində təbiət leksikası” adlı fəlsəfə doktorluğu hazırlığı üzrə dissertasiyasına rəsmi rəyini hazırlayıb.
Karantin dövründə İnstitut əməkdaşlarının beynəlxalq və yerli elm mərkəzləri ilə əlaqələrində də səngimə hiss olunmur. İnstitut əməkdaşları həm respublika xaricində, həm də respublikada keçirilən tədbirlərə, elmi seminar və konfranslara onlayn şəkildə qatılır, məruzələrlə çıxış edirlər. Bundan başqa, akademik Möhsün Nağısoylunun Naxçıvan Dövlət Universitetində aprelin 30-da keçiriləcək “Naxçıvanlı tərcüməçilər” respublika konfransında məruzə ilə iştirak etməsi nəzərdə tutulur. Filologiya üzrə fəlsəfə doktoru Fidan Salayeva onlayn qatıldığı konfransda məruzə ilə iştirak edib, sertifikatla təltif olunub. Amerikanın Miçiqan Universitetinin professoru Timur Kocaoğlu tərəfindən təşkil olunan “Türkbilim” beynəlxalq onlayn konfransın seminarlarında Türk dilləri şöbəsinin müdiri Elçin İbrahimov, Təhsil şöbəsinin müdiri Qətibə Quliyeva, gənc tədqiqatçı Dilbər Camali iştirak edib, dilşünaslıq, müasir türkologiyanın aktual problemləri, qədim dillər və yazı sistemlərinə dair aparılan müzakirələrə qatılıblar. Bundan başqa, filologiya üzrə fəlsəfə doktoru Xədicə Heydərovanın Polşanın beynəlxalq indeksli “Internatıonal Academy Journal” (Web of Scholar) jurnalında Mahmud Kaşğari lüğətinin tərtibi prinsiplərinin təhlilinə dair məqaləsi dərc olunub. Lüğətçilik şöbəsinin əməkdaşı, dosent Füzuli Mustafayevin Almaniyada dərc olunan beynəlxalq indeksli “Zeitschrift fuer die Welt der Tuerken/Journal of World of Turks” jurnalında “Sinema dili ve sözlü edebi dil” adlı məqaləsi dərc edilib.
Dünyanı çənginə alan COVID-19 pandemiyası dövründə Dilçilik İnstitutun əməkdaşları elmi fəaliyyətlərini sosial təcrid şəraitində də davam etdirir, mövcud şəraitdə əldə olan bütün qaynaqlardan istifadə edərək elmi yaradıcılıqlarını genişləndirir, onlayn müzakirələr keçirir, telegörüşlərdə iştirak edir, plan işləri, monoqrafiya, kitab və məqalələrin hazırlanması üzrə müvafiq məsləhətləşmələr aparırlar.
Bölmənin digər xəbərləri
