DİM: Təlimlərə 42 rayon üzrə 1930 nəzarətçi-müəllim cəlb edilib
Bakı, 29 yanvar, AZƏRTAC
Bakının Yasamal, Binəqədi, Xətai, Səbail, Xəzər, Nərimanov, Suraxanı rayonları, həmçinin Naxçıvan, Şuşa, Laçın, Zəngilan, Göyçay, Şəki, Babək, Culfa, Ordubad, Sədərək, Şərur, Şahbuz, Kəngərli, Mingəçevir, Oğuz, Salyan, Sabirabad, Quba, Xızı, Şabran, Lerik, Yardımlı, Biləsuvar, Cəlilabad, Kürdəmir, Qobustan, Şamaxı, Ağsu, Zərdab, Yevlax, Tərtər, Göygöl, Goranboy, Şəmkir, Gədəbəy şəhər və rayonları üzrə zal nəzarətçisi kimi imtahanlara cəlb edilməsi nəzərdə tutulan müəllimlər üçün yanvarın 21-dən 28-dək qrafikə uyğun olaraq təlimlər keçirilib.
Bu barədə AZƏRTAC-a Dövlət İmtahan Mərkəzindən (DİM) məlumat verilib. Bildirilib ki, DİM-in mərkəzi aparatının və regional bölmələrinin əməkdaşları tərəfindən aparılan təlimlərə 42 rayon üzrə 1930 nəzarətçi-müəllim cəlb edilib. Müxtəlif səbəblərdən seminarlarda iştirak edə bilməyən 188 nəzarətçi-müəllim qrafikə uyğun olaraq növbəti rayonlar üzrə keçiriləcək təlimlərə dəvət edilib.
Təlimlər ayrı-ayrı rayonlar (şəhərlər) üzrə 15 nəfərlik qruplarla onlayn formada aparılır. Təlimdə nəzarətçilərə imtahanın gedişi - abituriyentlərin imtahan zalına buraxılması zamanı sənədlərin yoxlanılması, öz sıra və yerlərində oturdulması, cavab kartlarının (vərəqlərinin), sual kitabçalarının paylanmasında diqqət yetirilməli olan məqamlar, nəzarətçi protokolunun düzgün doldurulması, abituriyentlərin təlimat qaydalarına uyğun davranışı, imtahan rəhbərləri ilə koordinasiyalı fəaliyyətin qurulması və imtahan zalının idarə olunması qaydası izah edilir.
Təlimlərdə, həmçinin açıq tipli test tapşırıqlarının cavablarının qeyd olunması və xarici dil fənni üzrə imtahanda “dinləyib-anlama” bacarıqlarının yoxlanılması üçün istifadə olunacaq dinləmə qurğusunun işlədilmə qaydaları nəzarətçilərin diqqətinə çatdırılır. Bunların yaddaşda möhkəmləndirilməsi məqsədilə imtahanın bütün mərhələlərini özündə əks etdirən slaydlar nümayiş etdirilir.
Təlimlər əvvəlcədən elan olunmuş qrafikə uyğun olaraq digər rayonlarda davam edəcək.
Bölmənin digər xəbərləri
