Donald Tramp Çin mallarına tarifi 100 milyard dollaradək artırmağı təklif edib
Vaşinqton, 7 aprel, AZƏRTAC
Prezident Donald Tramp ABŞ Ticarət Nümayəndəliyinə Çin mallarına tariflərin 100 milyard dollaradək artırmaq imkanını nəzərdən keçirməyi tapşırıb. Donald Trampın bəyanatında bildirilir ki, Çin tərəfindən ədalətsiz cavab tədbirləri səbəbindən ABŞ Ticarət Nümayəndəliyinə tariflərin 100 milyard dollaradək artırılması imkanını nəzərdən keçirmək tapşırılıb. Bu cür tarifləri tətbiq etməyin mümkün olduğu malların siyahısını müəyyənləşdirmək lazımdır.
AZƏRTAC xəbər verir ki, ABŞ-ın Ticarət haqqında qanunu prezidentə beynəlxalq ticarət sazişini pozan, yaxud hüquqa zidd, əsası olmayan, diskriminasiya xarakterli, ABŞ-ın kommersiya fəaliyyətini və ticarətini çətin vəziyyətə salan və məhdudlaşdıran xarici hökumətin istənilən əməliyyatını, siyasi akt və ya praktikasını aradan qaldırmaq üçün lazımi addımlar atmaq hüququ verir.
Xatırladaq ki, Çin tərəfinin ABŞ mallarına qarşı tarifləri Donald Trampın “Çinin iqtisadi təcavüzünə qarşı mübarizə haqqında” memorandumu imzalamasından 24 saat sonra buna cavab olaraq tətbiq edilib.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
