Martın 28-də Dövlət Gömrük Komitəsinin sədri, gömrük xidməti general-polkovniki Kəmaləddin Heydərov respublikamızda səfərdə olan Gürcüstanın Dövlət Sərhəd Mühafizəsi Departamentinin sədri, general-leytenant Valeri Çxeidzeni qəbul etmişdir.

Qonağı səmimiyyətlə salamlayan DGK sədri K.Heydərov Azərbaycan ilə Gürcüstan arasında mövcud olan dostluq əlaqələrindən danışdı, hər iki ölkə prezidentlərinin xalqlarımızın, ölkələrimizin yaxınlaşması üçün son illər ərzində çox böyük işlər gördüklərini vurğuladı, bu səfəri sərhəd və gömrük xidmətlərinin xoş münasibətlərinin dərinləşməsi istiqamətində növbəti mərhələ kimi qiymətləndirdi.

Azərbaycan-Gürcüstan sərhəd və gömrük xidmətləri arasında əməkdaşlığın daha da gücləndirilməsinin son dərəcə əhəmiyyətli olduğunu qeyd edən Valeri Çxeidze bildirdi ki, əgər sərhəd qoşunları ümumilikdə ölkənin sərhədlərinin təhlükəsizliyini təmin edirsə, onlarla çiyin-çiyinə sərhəddə həm də gömrük xidməti fəaliyyət göstərir, ölkənin iqtisadi təhlükəsizliyini qoruyur. Ona görə də son nəticədə hər iki xidmətin ümumi bir vəzifəni yerinə yetirdiyi ortaya çıxır. Ölkə iqtisadiyyatının möhkəmlənməsi müxtəlif qaçaqmalçılıq hallarının qarşısının alınmasına, narkotik vasitələr və psixotrop maddələrə qarşı mübarizənin gücləndirilməsi istiqamətində görülən tədbirlər dövlətin iqtisadi gücünün artırılmasına yönəldilib ki, bu da iqtisadi cəhətdən güclü olan dövlətdə sərhəd mühafizə xidmətinin daha da modernləşdirilməsinə, güclü olmasına imkanlar yaradır. Bu baxımdan gömrük xidməti tərəfindən həyata keçirilən tədbirlər dövlət büdcəsinin gəlirlərini artırdığı kimi, sərhəd xidmətinin güclü olması da gömrük orqanlarına öz funksiyalarını daha rahat şəkildə yerinə yetirməyə imkan verir.

Hər iki ölkənin mövcud probemlərinə də münasibət bildirən V.Çxeidze, nəzarət olunmayan ərazilərdə qeyri-qanuni əməllərin baş verdiyini nəzərə çarpdırdı. Bu gün hər iki ölkənin gömrük xidmətlərinin əlaqəli şəkildə işlədiyini vurğulayan hörmətli qonaq onu da bildirdi ki, tranzit mal daşımaları zamanı ölkələrimizin həm sərhəd qoşunları, həm də gömrük xidmətləri arasında informasiya mübadiləsinin daha da gücləndirilməsi tranzit daşımalarıdan qaçaqmalçılıq məqsədi üçün istifadə edilməsinin qarşısının alınmasına ciddi təkan verəcəkdir.

Gürcüstan-Azərbaycan sərhədində biznesmenlərin işinin nisbətən rahat olduğunu diqqətə çatdıran DGK sədri Kəmaləddin Heydərov son zamanlar bunu Gürcüstan və Azərbaycan sərhəd qoşunlarının, gömrük xidmətlərinin səviyyəsinin yüksəldiyinin nəticəsi kimi xarakterizə etdi. Eyni zamanda, gömrük orqanlarının öz funksiyasını yerinə yetirməsi zamanı sərhədçilər tərəfindən onlara müvafiq kömək göstərilməsinin vacib olduğunu da bildirdi.

Görüşdə sərhəd pozucularına, eləcə də qaçaqmalçılara qarşı birgə mübarizənin vacib olduğuna toxunan K.Heydərov dedi ki, məhz bu cür hallara yol verənlərin qanunla cəzalandırılması həmin halların sayının azalmasına gətirib çıxara bilər. Ona görə də belə halların qarşısının kəskin şəkildə alınması hər iki ölkənin müvafiq xidmətlərinin qarşısında duran vacib vəzifələrdən biridir.

Azərbaycan və Gürcüstan gömrük xidmətlərinin hələ 1995-ci ilin may ayında birgə əməkdaşlıq haqqında hökumətlərarası sazişi imzaladıqlarını söyləyən DGK sədri Kəmaləddin Heydərov, o vaxtdan etibarən hər iki ölkənin gömrük orqanları arasında informasiya mübadiləsinin, iqtisadi əməkdaşlıq məsələlərinin uğurla həyata keçirildiyini, lakin bunun daha da gücləndirilməsinə ehtiyac duyulduğunu bildirdi.

Tərəflər hər iki ölkənin dövlət başçıları arasında olan qardaşlıq və dostluq ənənəsinə uyğun olaraq sərhəd və gömrük orqanlarının da buna uyğun əlaqələrin inkişaf etdirilməsinin çox vacib olduğunu bir daha vurğuladılar.

Görüşdə Azərbaycan Milli Təhlükəsizlik nazirinin müavini, Sərhəd Qoşunlarının komandanı, general-mayor Elçin Quliyev və Gürcüstanın Azərbaycandakı fövqəladə və səlahiyyətli səfiri Zurab Qumberidze iştirak etmişlər.