DÖVLƏT İDARƏÇİLİK AKADEMİYASINDA “HEYDƏR ƏLİYEV UNİVERSİTETİ”NİN NÖVBƏTİ MƏŞĞƏLƏSİ KEÇİRİLMİŞDİR

15.11.2006 [10:27]
Çap et
A⁺ A^-

AZƏRTAC xəbər verir ki, Azərbaycan Respublikasının Prezidenti yanında Dövlət İdarəçilik Akademiyasında “Heydər Əliyev Universiteti”nin “Heydər Əliyevin neft strategiyası- neft amili davamlı inkişafın əsas meyarıdır” mövzusunda növbəti məşğələsi keçirilmişdir.

Tədbirdə akademiyanın rektoru, əməkdar elm xadimi, professor Seyfəddin Qəndilov ölkəmizin iqtisadiyyatında başlıca amil olan neft strategiyasının, neft amilinin həyatımızda oynadığı böyük roldan, bu illər ərzində ümummilli lider Heydər Əliyev dühasının bəhrəsi olan neft siyasətinin uğurlarından danışmış, Prezident İlham Əliyevin bu sahənin inkişafı üçün gördüyü işlərin əhəmiyyətini diqqətə çatdırmışdır. Rektor müstəqillik şəraitində iqtisadiyyatımızın inkişafı, xalqımızın güzəranının yaxşılaşdırılmasında neft amilinə diqqətin artırılmasının zəruriliyini qeyd etmiş, bu gün respublikamızda görülən işlərin gələcəyimiz üçün çox gərəkli olduğunu bildirmişdir.

Professor Eldar Şahbazov respublikamızın neft strategiyası haqqında geniş məruzə etmiş, Azərbaycan neft və qaz sənayesinin inkişafı istiqamətində görülən işlərdən danışmışdır.

Sonda dinləyicilərin çoxsaylı sualları cavablandırılmışdır.