Cəlilabad, 25 iyul (AZƏRTAC, Bağır Əliyev). Azərbaycan Respublikası Sərhəd Mühafizəsinin 95-ci ildönümü ərəfəsində Dövlət Sərhəd Xidmətinin (DSX) həyata keçirdiyi silsilə tədbirlərdən biri Göytəpə Sərhəd Dəstəsində baş tutdu.

AZƏRTAC xəbər verir ki, iyulun 25-də Göytəpə Sərhəd Dəstəsinin İdeoloji Mərkəzində Cəbrayıl, Biləsuvar, İmişli, Cəlilabad və Yardımlı rayonlarının sakinləri ilə görüş keçirildi.

“Sərhədlərimizin mühafizəsində yerli sakinlərin iştirakı” mövzusunda keçirilən tədbirdə həmin rayonların mədəniyyət və turizm şöbələrinin, gənclər və idman idarələrinin, təhsil şöbələrinin rəhbərləri, ərazi icra nümayəndələri, bələdiyyələrin sədrləri və yerli sakinlər iştirak edirdilər.

Görüşdə çıxış edən “N” saylı hərbi hissənin komandiri, polkovnik Namiq Əliyev dövlət sərhədlərinin mühafizəsində göstərdikləri köməkliyə görə sərhədyanı ərazidə yaşayan sakinlərə minnətdarlığını bildirdi.

Tədbirdə DSX-nın şəxsi heyət üzrə baş idarəsi rəisinin müavini, polkovnik İzəddin Musayevin “Azərbaycan Sərhəd Mühafizəsinin tarixi” mövzusunda məruzəsi dinlənildi. Qeyd olundu ki, Vətənimizin sərhədlərinin toxunulmazlığının təminatı məsələ­lərinə göstərilən yüksək dövlət qayğısı nəticəsində bu gün Dövlət Sər­həd Xidməti dinamik şəkildə inkişaf edir.

Ardı­cıl həyata keçirilən islahatlar, geniş tikinti-quruculuq işləri, hərbi texnikanın və xüsusi-texniki avadan­lığın yenilənməsi, şəxsi heyətin peşəkarlıq səviyyəsi­nin yük­səl­dilməsi ilə mü­şa­yiət olunan bu inkişafın təməlində ulu öndər Heydər Əliyevin müəy­­yən etdiyi milli sərhəd siyasəti durur. Bu siyasət Azər­bay­can Respublikasının Prezidenti, Ali Baş Komandan İlham Əliyevin rəhbərliyi ilə uğurla həyata keçirilir.

Bildirildi ki, dövlət sərhədlərinin mühafizəsi-dövlətin təhlükəsizliyinin, suve­renliyinin, ərazi bütövlüyünün təmin edil­mə­si məqsədilə həm­sərhəd dövlətlərlə əməkdaşlıq və sərhəd mübahisələrinin sülh yolu ilə təmin edilməsi prinsipləri əsasında həyata keçirilən xidməti fəaliy­yətdir. Dövlət Sərhəd Xidmətinin əsas vəzifələri bey­nəl­xalq terrorçu­luğa, qeyri-leqal miqrasiyaya, narkotik vasitələrin qa­nun­­suz döv­riy­yəsinə, qaçaqmalçılığa, kütləvi qırğın silahlarının və onların kompo­nent­lərinin yayılmasına qarşı mübarizə və Xəzər də­nizində karbohid­rogen ehtiyatları hasilatının və ixrac neft-qaz infrastruk­turunun mühafizəsidir.

Diqqətə çatdırıldı ki, XX əsrin əvvəllərində ölkəmizin sərhəd mühafizə qüvvələ­rinin forma­laş­dırılması Şərqdə ilk demokratik respublika olan Azərbaycan Xalq Cümhuriyyətinin adı ilə bağlıdır.

Milli parla­men­timiz 1919-cu il avqustun 18-də Azər­baycan Demokratik Respublikası­nın sərhəd müha­fizəsinin təsis edilməsi haqqında qanun qəbul etdi. Ümumilikdə 99 sərhəd mühafizə postunun yaradılmasını nəzərdə tutan qanun xarici qüvvələrin işğalçılıq siyasəti nəticə­sində 6 ay qüvvədə oldu. Azərbaycan Xalq Cümhuriyyətinin sü­qu­tu ilə sərhəd mühafizəsi istiqamətində görülən işlər yarım­çıq qaldı. Lakin qısa müddət ərzindəki fəaliy­yəti nəticəsində sər­həd və sərhədçi anlayışı dövlət müstəqil­li­yi­nin vacib atributu kimi şüurlara həkk olundu.

Keçmiş SSRİ dövründə dövlət sərhədlərinin mühafizəsi məsələlərinin ümumi mərkəzdən idarə olunmasına və milli kad­rların təhlükəsizlik sahəsində irəliləməsinə süni maneələrin ya­ra­dıl­ma­sına baxmayaraq əha­li­yə, dövlət sərhədinin müqəddəsliyi və toxunulmazlığı ideyalarının, sərhədçi peşəsinə hörmət hissinin aşılanmasının böyük əhəmiyyəti oldu.

Qeyd olundu ki, Azərbaycanda sərhədlərin müha­fizəsi sahəsində əldə edilmiş bütün uğurlar xalqımızın böyük oğlu, ulu öndər Heydər Əliyevin adı ilə bağlıdır. 2002-ci il iyulun 31-də ulu öndər Heydər Əliyev Azərbay­can Respublikasının Dövlət Sər­həd Xidmətinin yaradılması barədə Fər­man imzaladı.

Dövlət Sərhəd Xidmətinin yaradılması və ona mərkəzi icra hakimiy­yəti orqanı statusunun verilməsi ilə Azərbaycan sərhəd­çilərinin fə­­a­liyyəti keyfiy­yətcə yeni mərhələyə qədəm qoydu. Dövlət Sərhəd Xidməti qarşısında müasir dövrün tələblərinə uyğun olaraq yeni vəzifə­lər qoyuldu və sərhəd təh­lü­kə­siz­liyinin təminatı məsə­lələri ən yük­sək səviyyədə həll olun­mağa başlandı.

Diqqətə çatdırıldı ki, hazırda Azərbaycan quru və dənizdə 7 ölkə - Rusiya, Gür­cüs­tan, Ermənistan, Türkiyə, İran, Türkmənistan və Qazaxıs­tan ilə həm­sər­­həd­dir. Dövlət sərhədlərinin ümumi uzunluğu 3370,4 kilometrdir.

Görüşdə çıxış edən “N” saylı hərbi hissənin komandirinin müavini, polkovnik Bəhruz Tağıyev Sərhəd Qoşunlarının təyinatı, hüquq və vəzifələri, hərbi hissənin şəxsi heyətinin fəaliyyəti və dövlət sərhədində mövcud vəziyyət barədə məlumat verdi.

Tədbirdə çıxış edən sərhədyanı rayonların sakinləri sərhədçilərlə yerli əhalinin əlaqələri istiqamətində görülən işlərdən danışdılar. Sakinlər sərhədçiləri Azərbaycan Respublikası Sərhəd Mühafizəsinin yaranmasının 95-ci ildönümü münasibətilə təbrik edərək, Vətənin sərhədlərinin etibarlı qorunmasına görə onlara minnətdarlıqlarını bildirdilər.

Görüşdə dövlət sərhədlərinin mühafizəsində fəallıq nümayiş etdirən yerli sakinlərin bir qrupuna fəxri fərmanlar və qiymətli hədiyyələr təqdim olundu.

Tədbirin sonunda sərhədçi qəhrəmanlara həsr olunmuş sənədli film nümayiş etdirildi.