Dövlət Vergi Xidməti: Yerli istehsalın təşviqi ilə bağlı vergi tənzimləmələri həyata keçiriləcək
Bakı, 20 sentyabr, AZƏRTAC
Mütəmadi aparılan təhlillər hansı məhsulların idxalından asılılığın mövcudluğunu və həmin məhsulların ölkədə istehsalının həcminin artırılması üçün nə kimi iqtisadi təşviq alətlərinə ehtiyac olduğunu müəyyən edir.
AZƏRTAC Dövlət Vergi Xidmətinə istinadla xəbər verir ki, bu tənzimləmə alətlərindən biri də vergi təşviqləri olduğuna görə, qarşıdakı dövrdə dövlət tərəfindən yerli istehsalın təşviqi ilə bağlı vergi tənzimləmələri həyata keçiriləcək.
Bu baxımdan, maliyyə və kapital bazarlarının inkişafının da vergi yolu ilə tənzimlənməsi və təşviqi nəzərdə tutulur. Belə ki, maliyyə və kapital bazarları nə qədər inkişaf etsə, bir o qədər real sektorun inkişafına dəstək verə bilir.
Həmçinin ölkəmizin uzunmüddətli dövrdə dayanıqlı inkişafının təmin edilməsində investisiyaların cəlb edilməsi xüsusi rol oynayır. Bu məqsədlə biznes mühiti mütəmadi olaraq təkmilləşdirilir və investorlar üçün cəlbediciliyi artırılır. Vergi qanunvericiliyində sahibkarlığın dəstəklənməsi ilə bağlı həyata keçirilən məqsədyönlü dəyişikliklərin nəticəsində ölkədə investisiya şərtlərinin səmərəliliyinin artması yeni mərhələyə qədəm qoyacaq.
Bölmənin digər xəbərləri
