DST SAXTA DƏRMAN TİCARƏTİNƏ SON QOYMAĞA ÇAĞIRIR

18.11.2006 [12:26]
Çap et
A⁺ A^-

Dünya Səhiyyə Təşkilatı (DST) bütün ölkələri saxta dərman ticarətinə son qoymağa çağırır. AZƏRTAC DST-nin bəyanatına istinadla xəbər verir ki, saxta dərmanlar bəzi ölkələrdə tibb preparatları bazarının ümumi həcminin 30 faizini təşkil edir. DST-nin bəyanatında deyilir ki, saxta dərmanlar xəstələrin səhhətinə ağır ziyan vurur və onların həyatını təhlükə qarşısında qoyur.

DST dərman vasitələrinin saxtalaşdırılması ilə mübarizə üçün yeni beynəlxalq proqram həyata keçirməyə başlamışdır. Bundan ötrü DST-nin İMPACT adlı xüsusi bölməsi yaradılır və bölmənin işində təşkilata üzv ölkələrin güc qurumları, dünyanın ən iri əczaçılıq korporasiyaları və İnterpol iştirak edəcəklər. Proqramın başlıca məqsədi tibb preparatlar bazarına nəzarəti gücləndirmək, habelə saxta məhsul istehsalı ilə bağlı cəzaları sərtləşdirməkdir.

Son məlumatlara görə, Latın Amerikasının, Cənub-Şərqi Asiyanın və Afrikanın ən yoxsul regionlarında satılan dərmanların 30 faizi saxtadır. SSRİ-nin süqutundan sonra yaranmış dövlətlərin bəzilərində bazarın 20 faizini saxta dərmanlar təşkil edir.

DST bildirir ki, İnternet vasitəsilə satılan tibb preparatlarının 50 faizi saxtadır.

Saxta dərmanların dünya bazarlarında illik dövriyyəsi 30 milyard dollara çatır.