Ədalət Həsənov: Bir şəxsə malik sümük qalıqları ayrı-ayrı kütləvi məzarlıqlarda aşkarlanır
Bakı, 9 oktyabr, G.Mahmudlu, T.Babayeva, AZƏRTAC
Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin laboratoriyalarında 327 şəxsə məxsus sümüklərdə aparılan araşdırmalar nəticəsində onlara həyati xəsarətlər yetirildiyi təsdiq edilib.
AZƏRTAC xəbər verir ki, bunu Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin direktoru Ədalət Həsənov “İtkin düşmüş şəxslər probleminin həlli üçün səylərin birləşdirilməsi və əməkdaşlığın genişləndirilməsi” mövzusunda beynəlxalq konfrans çərçivəsində keçirilən sessiyada çıxışı zamanı deyib.
Onun sözlərinə görə, işğaldan azad edilmiş ərazilərdən indiyədək Məhkəmə-Tibbi Ekspertiza və Patoloji Anatomiya Birliyinə 800-ə yaxın şəxsə məxsus sümük qalıqları qəbul edilib. 187 nəfərin meyiti Əsir və itkin düşmüş, girov götürülmüş vətəndaşlarla əlaqədar Dövlət Komissiyasının tövsiyəsi və iştirakı ilə ailələrə təhvil verilib.
O, həmçinin bildirib ki, ən çox problem kütləvi məzarlıqlarla bağlı olur. Belə ki, bəzən kütləvi məzarlıqlarda müəyyən edilmiş bir şəxsə aid sümük qalıqları bir-birindən kilometrlərlə, hətta 10 kilometrlərlə uzaq məsafələrdə olan iki, hətta üç ayrı kütləvi məzarlıqda aşkarlanır.
Bölmənin digər xəbərləri
