Ədəbiyyat Muzeyində Xalq şairi Səməd Vurğunun 120 illiyi qeyd olunub
Bakı, 15 may, AZƏRTAC
Mayın 15-də Nizami Gəncəvi adına Milli Azərbaycan Ədəbiyyatı Muzeyində Xalq şairi Səməd Vurğunun anadan olmasının 120-ci ildönümünə həsr edilmiş “Dilinə, millətinə, yurduna vurğun” adlı ədəbi-musiqili tədbir keçirilib.
Bu barədə AZƏRTAC-a muzeydən məlumat verilib.
Tədbiri açan muzeyin direktoru akademik Rafael Hüseynov XX əsr Azərbaycan ədəbiyyatının qüdrətli simalarından biri olan Səməd Vurğunun ömür yolundan, çoxşaxəli fəaliyyətindən, onun Azərbaycanın ədəbi fikir salnaməsindəki rolundan danışıb. O, zəngin fəaliyyətinin qayəsində azərbaycançılıq amalı dayanan şairin milli-mənəvi dəyərlərimizin formalaşmasında böyük rol oynadığını bildirib, Səməd Vurğunu istedadlı insan, parlaq şəxsiyyət kimi xarakterizə edib. Bildirib ki, böyük söz ustası ana dilinin saflığı uğrunda dönmədən mübarizə aparıb, xalq yaradıcılığının tükənməz xəzinəsindən bəhrələnməklə bu dilin bütün məna gözəlliklərini özündə əks etdirən, dərin bəşəri-ictimai məzmuna malik qiymətli əsərlər ərsəyə gətirib.
Akademik Rafael Hüseynov qeyd edib ki, Səməd Vurğun 1945-ci ildə Azərbaycan SSR Elmlər Akademiyasının təsisçilərindən və ilk həqiqi üzvlərindən biri, ömrünün sonlarında isə vitse-prezidenti olub. O, vaxtilə Azərbaycan Elmlər Akademiyasının prezidenti olmuş akademik Musa Əliyevin Azərbaycan dilində nəşr edilmiş xatirələrində yaxın dostu Səməd Vurğunla bağlı qələmə aldığı fikirləri diqqətə çatdırıb.
Vurğulanıb ki, ədibin milli poeziyanı yüksəklərə qaldıran romantik və fəlsəfi məzmunlu bənzərsiz lirikası Azərbaycan ədəbiyyatının qızıl fonduna daxildir. Keçmişə ehtiram və gələcəyə inam aşılayan Vurğun dramaturgiyası Azərbaycanın teatr sənəti tarixində xüsusi səhifə təşkil edir.
“Səməd Vurğunun novator keyfiyyətlərlə zəngin bədii irsi bir məktəb kimi müasir Azərbaycan poeziyasına güclü təsir göstərib və bu gün də gənc nəslin milli-mənəvi dəyərlərə sədaqət ruhunda yetişməsində əhəmiyyətli rol oynayır. Şairin təkcə yaradıcılığı deyil, bütövlükdə şəxsiyyəti də azərbaycançılıq idealına xidmət edib”, - deyə akademik Rafael Hüseynov əlavə edib.
“Dilinə, millətinə, yurduna vurğun” adlı tədbirdə Bakı şəhərinin məktəb və liseyləri də təmsil olunublar.
Muzeyin əməkdaşı filologiya üzrə fəlsəfə doktoru Nəzmiyyə Yigitoğlunun aparıcılığı ilə davam edən tədbirdə məktəblilər Səməd Vurğunun şeirlərini səsləndirib, ədibin sözlərinə bəstələnmiş mahnılar ifa edib, “Vaqif” tamaşasından səhnələr göstəriblər.
Tədbirdə Abdulla Şaiqin ev-muzeyinin direktoru Ülkər Talıbzadə, şairin nəticəsi, Səməd Vurğunun ev-muzeyinin direktoru Vurğun Vəkilov və ədibin ev-muzeyinin əməkdaşları iştirak ediblər.
Muzeyin Məktəblərlə və ictimaiyyətlə iş şöbəsinin və Həmkarlar Təşkilatının birgə səyləri ilə baş tutmuş tədbirdə məktəblilər Fəxri fərmanlarla təltif olunublar.
Bölmənin digər xəbərləri
