ƏDLİYYƏ NAZİRLİYİ MƏTBUAT XİDMƏTİNİN M Ə L U M A T I
Azərbaycan Respublikasında aparılan demokratik islahatlar çərçivəsində sahibkarlığın inkişafına, xarici şirkətlərin və humanitar təşkilatların fəaliyyətinə zəruri şərait yaradılmış, qaçqın və məcburi köçkünlərin, eləcə də əhalinin digər aztəminatlı hissəsinin sosial problemlərinin həllində beynəlxalq humanitar təşkilatların xidmətindən səmərəli istifadə edilməsi, onların fəaliyyətinin tənzimlənməsi üçün bir sıra məqsədyönlü tədbirlər həyata keçirilmişdir.
Ölkəmizdə fəaliyyət göstərən xarici humanitar təşkilatların əksəriyyəti qanunvericiliyə tam riayət etməklə öz xeyirxah niyyətlərinə uyğun fəaliyyət göstərirlər. Lakin bəzi xeyriyyə təşkilatları humanitar yardım pərdəsi arxasında dövlətimizin demokratik prinsiplərinə zidd ideyaların, dini ayrı-seçkiliyin təbliği ilə məşğul olmuş, digər çoxsaylı qanun pozuntularına yol vermişlər. Belə təşkilatlara qarşı əvvəllər müvafiq tədbirlər görülsə də bəziləri bundan lazımi nəticə çıxarmamışlar.
Belə ki, mərkəzi ofisi Küveytdə yerləşən “Xəstələrə Yardım Fondu” Xeyriyyə Cəmiyyətinin Azərbaycan şöbəsi humanist və xeyirxah təsir aşılayan ad altında gizlənməklə əslində ölkəmizin milli maraqlarına zidd fəaliyyət göstərmiş, Ədliyyə Nazirliyi tərəfindən zərərli fəaliyyətinə görə ləğv edilmiş “İslam İrsinin Dirçəlişi” Cəmiyyəti ilə sıx əməkdaşlıq etməklə, qanuna zidd üsullarla dini təbliğatla məşğul olmuş, gəncləri qeyri-qanuni silahlı birləşmələrin sıralarına cəlb etmək istiqamətində iş aparmış, Azərbaycan dövlətçiliyinə zidd çağırışlar etmişdir.
Bu təşkilatın fəaliyyəti nəticəsində qeyri-qanuni silahlı birləşmələrə cəlb edilmiş şəxslərdən 12 nəfəri məhkum edilmiş, 7 nəfər məhkəmə məsuliyyətinə verilmişdir.
Həmçinin, “Qətər” Xeyriyyə Cəmiyyətinin Azərbaycandakı nümayəndəliyi də cüzi humanitar yardım göstərməklə pərdələnərək, milli maraqlarımıza zidd zərərli fəaliyyətlə məşğul olmuş, terrorçu qurumlarla əməkdaşlıq etməklə radikal təriqəçilik, dini ədavət və fanatizm oyadan təbliğat aparmışdır.
“Xəstələrə Yardım Fondu”nun Azərbaycan şöbəsinin və “Qətər” təşkilatı nümayəndəliyinin dövlətçiliyimizə qarşı yönəlmiş, hüquqa zidd əməlləri vətəndaşların və həmçinin, respublikamızda həqiqi humanitar fəaliyyətlə məşğul olan xeyriyyə təşkilatlarının da haqlı narazılığına səbəb olmuşdur.
Azərbaycan Respublikasının Ədliyyə Nazirliyi zərərli fəaliyyətlə məşğul olan hər iki təşkilatın dövlət qeydiyyatını ləğv etmişdir.
Möhtərəm Prezidentimiz Heydər Əliyevin rəhbərliyi ilə ölkəmizdə aparılan demokratik islahatların müsbət nəticələrindən sui-istifadə edən, milli mənafeyimizə qarşı çıxan təşkilatların qarşısı bundan sonra da qətiyyətlə alınacaqdır.
Bölmənin digər xəbərləri
