ƏDLIYYƏ NAZİRLİYİNDƏ GÖRÜŞ
İyunun 17-də Azərbaycanın ədliyyə naziri Fikrət Məmmədov ölkəmizdə səfərdə olan Avropa Şurası Parlament Assambleyası Monitorinq Komitəsinin respublikamız üzrə həmməruzəçiləri Martines Kassan və Andreas Qross ilə görüşmüşdür.
Ədliyyə Nazirliyindən AZƏRTAC-a bildirmişlər ki, Avropa Şurası ilə səmərəli əməkdaşlığın əhəmiyyətini qeyd edən nazir Fikrət Məmmədov ölkəmizin Prezidenti Heydər Əliyevin rəhbərliyi ilə Azərbaycanda həyata keçirilən demokratik islahatlara və insan haqlarının təmin olunması üzrə görülən tədbirlərə toxunmuşdur.
Səmimi qəbula görə minnətdarlıqlarını bildirən qonaqlar müxtəlif bölgələrə səfərlərinin nəticələri, keçirdikləri, o cümlədən hüquq müdafiəçiləri ilə görüşləri barədə təəssüratlarını bölüşmüş, azadlıqdan məhrumetmə yerlərinə baş çəkərək saxlanılma şəraiti ilə tanış olduqlarını və müsbət dəyişiklikləri qeyd etmişlər.
Həmçinin, görüşdə qanunvericiliyimizin tətbiqi və məhkəmə təcrübəsi məsələləri, insan haqlarının daha etibarlı müdafiəsi və demokratik proseslərin inkişafı üzrə tədbirlər barədə faydalı fikir mübadiləsi aparılmış, qonaqları maraqlandıran suallara ətraflı cavablar verilmişdir.
Görüşdə ədliyyə nazirinin müavini, Məhkəmə Qərarlarının İcrası Baş İdarəsinin rəisi Aydın Qasımov iştirak etmişdir.
Bölmənin digər xəbərləri
