ƏDLİYYƏ NAZİRLİYİNİN PENİTENSİAR XİDMƏTİNİN MÜHAFİZƏ ALAYINDA İDMAN TƏDBİRİ KEÇİRİLMİŞDİR
Bakı, 20 noyabr (AZƏRTAC). Noyabrın 20-də Ədliyyə Nazirliyinin Penitensiar Xidmətinin mühafizə alayında 22 noyabr ədliyyə işçilərinin peşə bayramı münasibətilə qol gücü idmanı üzrə yarış keçirilmişdir.
Penitensiar Xidmətin və Bakı Şəhər Gənclər və İdman Baş İdarəsinin təşkil etdiyi idman tədbirində müxtəlif tağım və bölümlərin 80-dək hərbi qulluqçusu iştirak etmişdir.
Yarış iştirakçılarını peşə bayramı münasibətilə təbrik edən Penitensiar Xidmətin idarə rəisi Azər Seyidov Azərbaycanda idmanın inkişafına, güclü idmançıların yetişdirilməsinə dövlət səviyyəsində hərtərəfli qayğı göstərildiyini, təmsilçisi olduğu qurumun da bu istiqamətdə mütəmadi tədbirlər keçirdiyini bildirmişdir.
Bakı Şəhər Gənclər və İdman Baş İdarəsinin rəisi Raqif Abbasov Penitensiar Xidmətlə əməkdaşlığa böyük önəm verdiyini, xidmətin tabeliyində olan islah əmək müəssisələrində idman və gənclər siyasəti sahəsində mühüm tədbirlər təşkil edildiyini vurğulamışdır. Belə yarışların gələcəkdə də keçiriləcəyini söyləyən R.Abbasov qol gücü idmanında qüvvəsini sınayan əsgər və zabitlərə uğurlar diləmiş, güclü idmançının qalib gəlməsini arzulamışdır.
Yarışda 1,2 və 3-cü yeri tutmuş idmançılar diplom, kubok və xatirə hədiyyələri ilə mükafatlandırılmışlar.
Bölmənin digər xəbərləri
