ƏDLİYYƏ ORQANLARINDA QULLUĞA QƏBUL ÜZRƏ MÜSABİQƏYƏ SƏNƏD QƏBULU DAVAM EDİR
AZƏRTAC xəbər verir ki, ədliyyə orqanlarına qulluğa qəbulla bağlı elan edilmiş növbəti müsabiqə üzrə sənədlərin qəbulu və yoxlanılması başa çatdırılmışdır.
Tələbə Qəbulu üzrə Dövlət Komissiyası tərəfindən iyun-avqust aylarında respublikanın ali məktəblərinin bakalavr və magistratura pillələrinə, orta ixtisas məktəblərinə qəbul üzrə test imtahanlarının keçirilməsi ilə əlaqədar ədliyyə orqanlarına namizədlərlə imtahanın həmin dövrdə keçirilməsi mümkün olmayacaqdır.
Bununla əlaqədar vətəndaşların müraciətlərini nəzərə alaraq müsabiqədə iştirak etmək istəyən ali təhsilli hüquqşünasların sənədlərinin qəbulunun avqustun 15-dək uzadılması qərara alınmışdır.
Sənədlər iş günləri saat 9.00-dan 18.00-dək Azərbaycan Respublikası Ədliyyə Nazirliyinin inzibati binasında (Bakı şəhəri, İnşaatçılar prospekti 1) qəbul olunur.
Əlavə məlumat üçün nazirliyin internet saytına (www.justice.gov.az) və 430-01-18, 430-11-05 nömrəli telefonlarla müraciət etmək olar.
