“EDUARD ŞEVARDNADZE: “VƏTƏNDAŞ QARŞIDURMASINA YOL VERMƏMƏK ÜÇÜN İSTƏNİLƏN ŞƏXSLƏ DİALOQA HAZIRAM”
Noyabrın 13-də axşamdan xeyli keçmiş “Demokratik Dirçəliş İttifaqı” və Leyboristlər partiyalarının ərizəsi əsasında Kutaisi dairə məhkəməsi buradakı seçki məntəqələrindən həm majoritar qaydada keçirilmiş seçkilərin, həm də partiyalara verilən səslərin protokollarını ləğv etmiş və bir sıra seçki məntəqələrində səslərin yenidən hesablanmasına dair qərar vermişdir. Qeyd etmək lazımdır ki, həmin protokollara əsasən, müxalifətçi “Burcanadze-demokratlar” partiyasının liderlərindən biri, Gürcüstan parlamentinin sədri Nino Burcanadze deputat seçilmişdi.
Müxalifət 8-ci gündür ki, parlament binası qarşısında mitinqi davam etdirir. “Milli hərəkat”ın lideri Mixail Saakaşvili bir-iki günə prezidenti istefaya göndərəcəyinə, noyabrın 2-də keçirilmiş seçkiləri etibarsız elan etdirəcəyinə, yenidən prezident və parlament seçkiləri keçirilməsinə nail olacağını bildirir. Göründüyü kimi, artıq neçə gündür ki, “inqilabi” – populist çağırışlara uyan adamlar yağış və soyuq altında müxalifət liderlərinin vədlərinin həyata keçiriləcəyini gözləyirlər. Noyabrın 14-də burada aclıq elan edənlərə qoşulan “Milli hərəkat”ın Bolnisidən deputatlığa namizədi Kamal Muradxanov “Rustavi-2” telekanalının müxbirinə bildirmişdir ki, Gürcüstan Prezidenti istefaya getməyincə, aclığı dayandırmayacaqdır.
Dövlət başçısı Eduard Şevardnadze isə prezident aparatında adi iş rejimi ilə çalışır. O, noyabrın 14-də Türkiyə Cümhuriyyətinin Gürcüstandakı səfiri Fatma Dəclə Kopuzu qəbul etmiş, sonra jurnalistlər üçün brifinq keçirmişdir. Prezident ölkədə vətəndaş qarşıdurmasına yol verməmək üçün bir daha dialoqa, normal əməkdaşlığa, kimliyindən asılı olmayaraq, istənilən şəxslə görüşüb vəziyyəti qaydaya salmaq yollarını axtarmağa hazır olduğunu bir daha açıqlamışdır.
Prezident əhalini fitnə-fəsada uymamağa, hər kəsi öz işi ilə məşğul olmağa, ölkədə sabitliyi pozmağa can atanları odla oynamaqdan çəkinməyə, ağıl-kamalın səsinə qulaq asmağa çağırmış, mitinq iştirakçılarına əsəblərini cilovlayıb evlərinə qayıdıb, işlə məşğul olmağı məsləhət görmüşdür.
Parlament binası qarşısında mitinq iştirakçılarının sayı saatbasaat azalmaqdadır. Bəlkə də buna görədir ki, müxalifət mitinqi bazar ertəsinədək dayandırmağı qərara almışdır.
Bölmənin digər xəbərləri
