İDMAN
Əfsanəvi futbolçu Ələkbər Məmmədov vəfat edib
Bakı, 1 avqust (AZƏRTAC). Azərbaycan futbolunun görkəmli nümayəndələrindən biri, Əməkdar İdman Ustası, Əməkdar Məşqçi, Azərbaycan milli komandasının sabiq baş məşqçisi, AFFA-nın İcraiyyə Komitəsinin üzvü, “Şöhrət” ordeni laureatı, professor Ələkbər Məmmədov vəfat edib.
AZƏRTAC xəbər verir ki, Ələkbər Məmmədov 1930-cu il mayın 9-da Bakıda anadan olub. O, 1948-ci ildən 1953-cü ilədək Bakının “Neftyanik” komandasında çıxış edib. Ələkbər Məmmədov 1954-cü ildən karyerasını Moskvanın “Dinamo” komandasında davam etdirib. O, “Dinamo”nun heyətində dörd dəfə SSRİ çempionu adını qazanıb. Ələkbər Məmmədov 1958-ci ildə SSRİ yığma komandasına dəvət alıb. Məşhur futbolçu dəfələrlə SSRİ yığmasının tərkibində yaşıl meydana çıxıb. Yeri gəlmişkən o, “Dinamo”nun və SSRİ yığma komandasının tərkibində dünyanın 20-dən artıq ölkəsində çıxış edib. SSRİ-nin yüksək liqasında 185 oyun keçirən həmyerlimiz rəqib qapılarına 56 qol vurub.
Dünya miqyaslı futbolçu 1958-ci ildə SSRİ yığma komandasının tərkibində Avropa Kubokunun sahib olub. Ələkbər Məmmədov 1960-cı ildə yenidən Bakı qayıdıb və “Neftyanik” komandasının tərkibində oynamağa başlayıb. 1962-ci ilin sonunda o, yaşıl meydanla vidalaşaraq idman karyerasını məşqçi kimi davam etdirib. Ə.Məmmədov müxtəlif vaxtlarda “Neftçi”nin, 1993-cü ildə isə Azərbaycan yığma komandasının baş məşqçisi olub, Bakının ali təhsil müəssisələrində işləyib.
Ələkbər Məmmədov 1955-ci il sentyabrın 4-də Moskva “Dinamo”sunun heyətində “San-Siro” stadionunda “Milan” komandası ilə keçirilən qarşılaşmada dörd qol vuraraq rekorda imza atıb.
Allah rəhmət eləsin!