Əhalinin tibbi müayinəsi yüksək səviyyədə və mütəşəkkil keçirilməlidir
Lənkəran, 15 fevral (Bağır Əliyev, AZƏRTAC). Lənkəran Şəhər İcra Hakimiyyətində əhalinin tibbi müayinəsinə hazırlıqla bağlı müşavirə keçirilmişdir.
AZƏRTAC xəbər verir ki, müşavirədə çıxış edən şəhər icra hakimiyyətinin başçısı Taleh Qaraşov Prezident İlham Əliyevin Azərbaycan vətəndaşlarının sağlamlığının qorunmasına xüsusi diqqət və qayğı göstərdiyini vurğulamışdır. Qeyd olunmuşdur ki, ölkəmizdə tibb xidmətinin səviyyəsinin yaxşılaşması istiqamətində ardıcıl, təxirəsalınmaz tədbirlər görülür. Dövlətimizin başçısı tərəfindən bununla bağlı mühüm sərəncamlar və fərmanlar imzalamışdır. Respublikamızın hər yerində olduğu kimi, Lənkəran rayonunda da əhalinin sağlamlığının mühafizəsi daim diqqət mərkəzində saxlanılır. Regional Müalicə-Diaqnostika Mərkəzi, ötən il əsaslı şəkildə yenidən qurulan Mərkəzi Rayon Xəstəxanası və poliklinika şöbəsi, digər səhiyyə müəssisələri əhaliyə yüksək səviyyəli tibbi xidmət göstərir.
Müşavirədə bildirilmişdir ki, Azərbaycan Prezidentinin tapşırığına əsasən bütün ölkə vətəndaşlarının tibbi müayinəyə cəlb edilməsi dövlətimizin başçısının insanların sağlamlığına göstərdiyi diqqət və qayğının daha bir əyani təzahürüdür. Bu məqsədlə fevralın 17-dən başlayaraq 18 yaşdan yuxarı vətəndaşlar pulsuz tibbi müayinəyə cəlb ediləcəklər. Mühüm əhəmiyyətə malik bu tədbirin mütəşəkkil keçirilməsini təmin etmək üçün xüsusi komissiya yaradılmışdır.
Mərkəzi Rayon Xəstəxanasının baş həkimi Ağabala Kəlbiyev müşavirədə çıxış edərək yaranmış əlverişli imkandan hər kəsin maksimum yararlanmasının, kampaniyanın əhalinin bütün təbəqələrini əhatə etməsinin vacibliyini vurğulamış, təsdiq olunmuş iş qrafiki barədə məlumat vermişdir.
Bildirilmişdir ki, müayinənin keçirilməsinə Lənkəran Mərkəzi Rayon Xəstəxanasının və Müalicə-Diaqnostika Mərkəzinin həkim briqadaları və yüksək ixtisaslı tibb mütəxəssisləri cəlb edilmişdir. Fevralın 17-dən başlayaraq hər iki səhiyyə ocağında idarə, müəssisə və təşkilatların bütün işçiləri, yerlərdəki tibb məntəqələrində isə rayonun qəsəbə və kəndlərinin sakinləri həkim briqadaları tərəfindən müayinədən keçiriləcəklər.
Bölmənin digər xəbərləri
