Əl-Əzhər İslam Universitetinin baş imamı və Roma Papası birgə bəyanat yayıblar
Qahirə, 3 may, AZƏRTAC
Misirin Əl-Əzhər İslam Universitetinin Baş imamı Şeyx Əhməd əl-Tayyib və Roma Papası Fransisk mayın 14-də bütün dinlərdən olan insanları koronavirus pandemiyasına qarşı birlikdə dua etməyə çağırıblar.
AZƏRTAC xəbər verir ki, dini liderlər bununla bağlı birgə bəyanat yayıblar.
Bəyanatda bildirilir ki, həmin tarixdə dünyanın bütün dindarları pandemiyanın tezliklə aradan qalxması və alimlərin koronavirus bəlasına çarə tapması üçün dua edəcəklər. Qeyd olunub ki, ötən ilin fevralında Əl-Əzhər İslam Universitetinin baş imamı və Roma Papası arasında imzalanmış “İnsanların Qardaşlığı” adlı sənəddə din xadimlərinin bəşəriyyətin üzləşdiyi fəlakətlərə qarşı həmrəylik nümayiş etdirməsi niyyəti təsdiq edilib.
Roma Papası ötən cümə günü müqəddəs Ramazan ayının başlaması münasibətilə Əl-Əzhər baş imamının timsalında bütün müsəlmanları təbrik edib. Şeyx Əhməd əl-Tayyib və Roma Papası Fransisk COVID-19 pandemiyasına qarşı həmrəylik məsələsini müzakirə ediblər.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
