Əli Bayramlıdakı Heydər Əliyev adına mədəniyyət və istirahət parkında 14 çarpayılıq reabilitasiya mərkəzinin bünövrəsi qoyulmuşdur. Bu münasibətlə keçirilən mərasimdə iştirak edən əmək və əhalinin sosial müdafiəsi naziri Əli Nağıyev bildirdi ki, Azərbaycanın ərazi bütövlüyü uğrunda döyüşlərdə sağlamlığını itirmiş soydaşlarımıza qayğı göstərmək Azərbaycan Prezidenti Heydər Əliyevin daim diqqət mərkəzindədir. Nazirlik tərəfindən bu ilin may ayında Əli Bayramlıda Qarabağ müharibəsi əlilləri üçün 18 mənzilli yaşayış binası tikilib istifadəyə verilmişdir. Bünövrəsi qoyulan reabilitasiya mərkəzi isə 4 aya hazır olacaqdır. Bu müalicə ocağı təkcə Əli Bayramlıda deyil, ətraf rayonlarda yaşayan əlillərə də xidmət edəcəkdir.
Mərasimdə Qarabağ Müharibəsi Əlilləri, Veteranları və Şəhid Ailələri İctimai Birliyinin sədri Mehdi Mehdiyev əlillərə göstərilən bu qayğıya görə dövlətimizin başçısına minnətdarlığını bildirdi.
Sonra reabilitasiya mərkəzinin bünövrəsinə ilk beton məhlulu töküldü.
Nazir Əli Nağıyev həmin gün şəhər sakinlərinin bir qrupu ilə görüşərək, onların problemləri ilə tanış oldu, bəzi məsələlərin tezliklə həlli ilə bağlı müvafiq göstərişlər verdi.
