Elmdən istehsalata: yaşıl hidrogen texnologiyaları sahəsində tədqiqatlar
Bakı, 29 iyul, AZƏRTAC
Elm və Təhsil Nazirliyi Kimya İnstitutu aparılan elmi tədqiqatların sənayedə tətbiqini genişləndirmək istiqamətində konkret addımlar atır.
İnstitutdan AZƏRTAC-ın sorğusuna cavab olaraq bildirilib ki, Əlvan və qara metal tərkibli mineral xammalın emalı laboratoriyasında yaşıl kimya prinsiplərinə əsaslanan alunitin yeni emal texnologiyası hazırlanıb, laboratoriya şəraitində yaradılmış pilot qurğuda uğurla sınaqdan keçirilib. Hazırda texnologiyanın istehsalata tətbiqi imkanlarının qiymətləndirilməsi məqsədilə “Azəralüminium” MMC ilə əməkdaşlıq və danışıqlar davam etdirilir.
Kimya İnstitutunun qarşıdakı dövr üçün əsas hədəfi bərpaolunan enerji və yaşıl hidrogen texnologiyaları sahəsində beynəlxalq səviyyədə rəqabətqabiliyyətli elmi nəticələrin əldə edilməsi və onların praktik tətbiqinin genişləndirilməsidir. Bu məqsədlə yüksək səmərəliliyə malik elektrokatalizatorların və fotoelektrod materiallarının hazırlanması, Günəş enerjisindən istifadə etməklə hidrogen istehsalı üçün yeni texnologiyaların işlənməsi, habelə enerji çevrilməsi və saxlanması üçün innovativ materialların yaradılması prioritet istiqamətlər kimi müəyyənləşdirilib.
Bununla yanaşı, institutda laboratoriyalar müasir elmi çağırışlara uyğun şəkildə formalaşdırılıb. Kompozit materiallar və korroziyadan mühafizə laboratoriyasında müdafiə sənayesi üçün innovativ həllərin hazırlanması istiqamətində tədqiqatlar aparılır. Burada polad məmulatlar üçün istiyə və deformasiyaya davamlı qoruyucu örtüklər hazırlanıb və bu istiqamətdə aidiyyəti dövlət qurumları ilə əməkdaşlıq imkanları mövcuddur.
Perspektivli materiallar əsasında ekoloji cəhətdən təmiz, iqtisadi baxımdan səmərəli və uzunömürlü enerji sistemlərinin hazırlanması, laboratoriya tədqiqatlarının pilot tətbiqlərə keçirilməsi, beynəlxalq elmi layihələrdə iştirakın və sənaye müəssisələri ilə əməkdaşlığın genişləndirilməsi də institutun strateji hədəfləri sırasındadır.
Tədqiqatlar, həmçinin kimyəvi tullantılar və qaz emissiyalarının utilizasiyası üçün səmərəli katalitik sistemlərin hazırlanması, eləcə də korroziyaya davamlı nanokompozit materialların elektrokimyəvi üsulla alınması istiqamətlərini əhatə edir. Eyni zamanda, yaşıl korroziya inhibitorlarının və çoxfunksiyalı ekoloji sürtkülərin hazırlanması, Qarabağ və Şərqi Zəngəzurun dərman bitkiləri əsasında təbii və yeni nəsil sintetik enzim-izoenzim inhibitorlarının yaradılması, onların patoloji proseslərə qarşı eksperimental modellərdə effektivliyinin öyrənilməsi nəzərdə tutulur.
Bu istiqamətlər üzrə aparılan tədqiqatların qısa müddətdə tətbiqyönlü elmi nəticələrin əldə olunmasına və innovativ texnologiyaların inkişafına töhfə verəcəyi gözlənilir.
Müxbir - Tünzalə Zeyvəliyeva
Bölmənin digər xəbərləri
