ƏMƏKDAŞLIĞIN İNKİŞAF ETDİRİLMƏSİ NAMİNƏ
Palatanın idarə heyətinin sədri İ.Hüseynov iclası açaraq, öz vəzifəsinin icrasına yenicə başlayan Rusiyanın Azərbaycandakı Ticarət namayəndəliyinin rəhbəri Y.Şedrini təqdim etdi.
Y.Şedrin çıxışında əmin olduğunu bildirdi ki, ölkələrimizin biznes qurumları getdikcə artan rəqabət şəraitində öz fəaliyyətini daha da gücləndirəcək, Rusiya ilə Azərbaycan arasında qarşılıqlı surətdə faydalı ticarət-iqtisadi əməkdaşlığın inkişafına layiqli töhfə verəcəklər.
Milli Məclisin iqtisadi siyasət daimi komissiyasının sədri, akademik Z.Səmədzadə, Azərbaycanın Rus icmasının sədri, Milli Məclisin deputatı M.Zabelin, “Tatarıstan ticarət evi” Məhdud Məsuliyyətli Cəmiyyətinin baş direktoru İ.Şamilov, “AZEL” şirkətinin prezidenti İ.Yakovenko, “Tovuz Baltiya” şirkətinin baş direktoru N.Məmmədhəsənov və başqaları iclasda çıxış edərək, Rusiya şirkətlərinin Azərbaycan bazarına çıxması üçün yeni yolların və imkanların axtarılmasının, məhsulumuzun Rusiyaya ixracının artırılmasının vacibliyindən danışdılar. Qeyd olundu ki, perspektivli yüksək texnoloji və elmtutumlu sahələrdə ikitərəfli əməkdaşlığın inkişafına xüsusi diqqət yetirmək lazımdır.
İclasda 2007-ci ilin təxminən martında Moskvada üçtərəfli Azərbaycan-Türkiyə-Rusiya biznes görüşünün keçirilməsi məsələsi də müzakirə edildi. Bu tədbir çərçivəsində işgüzar diskussiya ilə yanaşı, Rusiyanın dövlət və biznes qurumlarının rəhbərləri ilə, Moskva Dövlət Universitetində, Ümumrusiya Azərbaycan Konqresinin nümayəndələri ilə də görüşlər keçiriləcəkdir. Palata üzvlərinin bu tədbirdə iştirakı strategiyasını müəyyənləşdirmək, Azərbaycan tərəfinin forumda qaldıracağı problemlərin müvafiq monitorinqini keçirmək nəzərdə tutulmuşdur.
