Daşkənddə “Mərkəzi Asiyada energetika sahəsində əməkdaşlıq və Energetika Xartiyası prosesinin yolu” mövzusunda beynəlxalq konfrans keçirilmişdir.

Energetika Xartiyası katibliyi və Özbəkistan hökuməti tərəfindən təşkil olunmuş konfransda Mərkəzi Asiya dövlətləri, Rusiya, Yaponiya, Cənubi Koreya, Çin, Türkiyə və İranın, o cümlədən beynəlxalq təşkilatların və işgüzar dairələrin nümayəndələri iştirak etmişlər.

Energetika Xartiyasının baş katibi Riya Kemper demişdir ki, Mərkəzi Asiya dövlətləri arasında energetika sahəsində əməkdaşlıq regionda uzunmüddətli iqtisadi sabitliyin təminatıdır.

Konfrans iştirakçıları Mərkəzi Asiya dövlətlərində energetika sahəsində faydalı sərmayə ab-havasının yaradılması, regionda enerji ehtiyatlarından istifadənin səmərəliliyinin yüksəldilməsi, o cümlədən neft, qaz və elektrik enerjisinin tranziti üçün sabit hüquqi bazanın təmin olunması məsələlərini müzakirə etmişlər.

Konfransda Azərbaycanın Özbəkistandakı səfiri Aydın Əzimbəyov da iştirak etmişdir.