Əmman, 16 noyabr (AZƏRTAC). İordaniyanın aparıcı mətbu orqanı olan gündəlik “Əl-Düstur” qəzetinin idarə şurasının sədri Əmin Maşakbe AZƏRTAC-ın müxbirinə müsahibəsində demişdir: “Bakı Beynəlxalq Humanitar Forumu öz miqyası, yüksək səviyyədə təşkil edilməsi və sakinlərin səmimi qonaqpərvərliyi ilə bizi mütəəssir etdi. Bu forum mənim və çoxlarının iştirak etdiyi ən yaddaqalan və parlaq tədbirlərdən biri oldu”.

Onun sözlərinə görə, III Bakı Beynəlxalq Humanitar Forumunun keçirilməsi çox mühüm qərar olmuş və iştirakçıların yüksək səviyyəsi ilə fərqlənmişdir. Forumda Türkiyə, Rumıniya, Bolqarıstan, Litva, Estoniya və digər ölkələrin sabiq prezidentlərinin, nüfuzlu siyasətçilərin, Nobel mükafatları laureatlarının, dünyanın 70 ölkəsini təmsil edən ictimai-siyasi və elm xadimlərinin iştirak etməsi buna sübutdur. Tədbir iştirakçılarının hamısı qlobal ümumbəşəri məsələlərin müzakirə edildiyi Bakı Forumunun böyük əhəmiyyəti, beynəlxalq humanitar əməkdaşlığın, müxtəlif ölkələrdə vətəndaş cəmiyyətlərinin inkişafının, həyatın keyfiyyətinin artırılmasının müxtəlif aspektləri barədə öz fikirlərini söyləmişlər.

O demişdir: “Mənim fikrimcə, Azərbaycan Prezidenti İlham Əliyevin forumda iştirak etməsi, bu tədbirin məqsədləri, habelə son illərdə ölkədə siyasi, iqtisadi, ictimai inkişaf sahəsində qazanılmış uğurlar haqqında nitqi tədbirə xüsusi status vermişdir. Dövlət başçısının Azərbaycan cəmiyyətində ictimai-siyasi islahatlar, iqtisadi sahədə uğurlar, adambaşına milli gəlirin artması, həyat səviyyəsinin yüksəlməsi barədə nitqi forumun açılış mərasimində iştirak edənlərin hamısına güclü təsir bağışlamışdır.

Azərbaycanın tərəqqisi və inkişafı elə bir faktdır ki, ölkənizə gələn hər kəsin bunu müşahidə etmək və öz gözləri ilə görmək imkanı vardır. İnkişaf etmiş infrastruktur, müasir memarlıq, böyük, geniş və təmiz küçələr, əzəmətli unikal obyektlər tikintisi və bir sıra başqa məqamlar Bakıda gəzməyə çıxan hər kəsin diqqətini cəlb etməyə bilməz. Ölkəniz sürətlə inkişaf edir və heç şübhəsiz, bu tərəqqidə Prezident İlham Əliyev mühüm rol oynayır. O, əhali arasında çox populyardır və yüksək etimad qazanmışdır. Mən Azərbaycanda bir neçə nəfərlə söhbətdən sonra yəqin etdim ki, onlar öz liderlərinə çox böyük sevgi və hörmət bəsləyirlər. Azərbaycana gələn qonaqlar yəqin edirlər ki, son 20 ildə bu dövlət sürətlə və dinamik inkişaf edir. Bu da aşkardır ki, iqtisadi artım və həyat səviyyəsinin yüksəlməsi sayəsində Azərbaycan xalqı özünü inamlı və rahat hiss edir. Azərbaycanda ölkənin liderinə, onun siyasətinə, sürətli ictimai-siyasi inkişafda onun mühüm roluna hörmət və ehtiram var. Mənim fikrimcə, Prezident İlham Əliyevin seçkilərdə inamlı qələbəsi ona növbəti dəfə yüksək etimad göstərmiş xalqın iradəsini nümayiş etdirmişdir. Bu həm də ölkəni bütün istiqamətlər üzrə irəliyə, firavanlığa və tərəqqiyə aparan siyasi rəhbərliyin müsbət rolunun etiraf edilməsi deməkdir. İlham Əliyev öz əməli fəaliyyəti ilə milli maraqlara cavab verən məqsədlərin həyata keçirilməsində böyük uğurlar qazanmış, bununla da xalqın dəstəyinə yiyələnmişdir”.

Ə.Maşakbe onu da bildirmişdir ki, bütövlükdə Bakı onun yaddaşında silinməz izlər qoymuşdur. O demişdir: “Bu şəhər bir sıra səbəblər üzündən xoşuma gəldi - sakinlərin xeyirxahlığı və qonaqpərvərliyi, zəngin tarixi irsin, mədəniyyət və memarlıq abidələrinin, Azərbaycanın çoxəsrlik ənənələrinin cəmləşdiyi tarixi paytaxtın gözəlliyi belə səbəblərdir”.

Əmin Maşakbe forumun işinin təşkili məsələsinə də toxunaraq qeyd etmişdir ki, forum çərçivəsində plenar iclaslar və 8 dəyirmi masa keçirilməsi çox əhəmiyyətli olmuşdur. O demişdir: “Forum iştirakçılarının çıxışları və diskussiyalar üçün kifayət qədər vaxt verilmişdi. Buna görə də forumu uğurlu və səmərəli hesab etmək olar, çünki çoxlu maraqlı məruzələr dinlənildi, qlobal humanitar ideyalarla əlaqədar müxtəlif fikirlər səsləndi, iştirakçıların hər biri bu məsələlərə münasibət bildirdi. Qeyd etmək lazımdır ki, Azərbaycan dövləti, Prezident İlham Əliyev forum iştirakçılarının Azərbaycan reallıqları ilə, bu ölkənin çoxəsrlik tarixi, arxeoloji və mədəni irsi ilə tanış olmalarına imkan yaratmışdı. Buna görə onlara səmimi təşəkkürümü bildirirəm. Ölkə ilə daha yaxından tanış olmaq üçün respublikanın rayonlarına təyyarə ilə səfərlər təşkil edilmişdi. Qəbələyə səfər çərçivəsində biz Azərbaycanın bu mənzərəli tarixi bölgəsinin müasir həyat səviyyəsi ilə tanış olduq. Qafqaz Albaniyasının qədim paytaxtı Qəbələ şəhərinin xarabalıqları, arxeoloji, etnoqrafik, numizmatik materiallar, qədim əlyazmalar, müdafiə qurğuları, məişət tikililəri, qədim alban məbədi, qədim İpək Yolu boyunca yerləşən karvansara və bir sıra başqa maraqlı obyektlər diqqətimizi xüsusilə cəlb etdi. Bütün bunlar forumun çox yüksək dərəcədə təşkil olunmasına dəlalət edir. Bir sözlə, şəxsən mənim Azərbaycana ilk səfərim həm tanışlıq mənasında, həm də elmi baxımdan çox faydalı oldu”.

Ə.Maşakbe “Multikulturalizm və özgünlük” mövzusunda dəyirmi masada məruzə ilə çıxış etmişdir. Həmin məruzədə multikulturalizm sahəsinin müxtəlif aspektləri, eyni bir cəmiyyətdə müxtəlif mədəniyyətlərin nümayəndələrinin yanaşı mövcud olması mexanizmlərindən bəhs olunurdu. O vurğulamışdır: “Mən öz məruzəmdə bu sahədə təhsilin və tərbiyənin, siyasi şüurun səviyyəsini artırmağın, vətəndaşlıq və özünüidentifikasiya konsepsiyası üzərində diqqəti cəmləşdirməyin vacibliyi, çoxetnikli və çoxmədəniyyətli cəmiyyətdə zəruri olan bir sıra başqa məsələlərə toxundum. Bu gün monoetnik cəmiyyət yoxdur, ona görə də söhbət multikulturalizmdən, siyasi plüralizmdən və tolerantlıqdan gedir. Başqa insanların cəmiyyətin bərabərhüquqlu üzvləri kimi qəbul edilməsi demokratik dəyərlərə, milliyyətindən və dini etiqadından asılı olmayaraq cəmiyyətin bütün üzvlərinə hörmət, qanunlara hörmət məsələlərinə diqqətin artırılması ilə bağlıdır. Bakıda müşahidə etdim ki, vətəndaşlar bir-birinə, başqa xalqların mədəniyyətinə, ölkənin qanunlarına hörmətlə yanaşırlar. Bu da cəmiyyətin tərəqqisi üçün əsasdır. Bu məsələdə Azərbaycanın təcrübəsi əhəmiyyətlidir və hiss olunur ki, Azərbaycan cəmiyyəti tolerantlıq vəziyyətindədir, qanunlara hörmət, bir-birinə və ölkədə yaşayan başqa millətlərə hörmət ruhunda tərbiyə edilmişdir”.

Əmin Maşakbe Azərbaycan və İordaniya münasibətləri məsələlərinə də toxunaraq qeyd etmişdir ki, ölkələrimiz arasında münasibətlər dostluq xarakteri daşıyır. Onun sözlərinə görə, bu dostluq və tərəfdaşlıq münasibətlərinin əsası ümummilli lider Heydər Əliyevin Azərbaycana rəhbərlik etdiyi dövrdə qoyulmuşdur və bu gün həmin xətt Prezident İlham Əliyev tərəfindən uğurla davam etdirilir. İordaniya kralı Zati-aliləri İkinci Abdulla ilə Prezident İlham Əliyev arasında dostluq münasibətləri yaranmış, bir neçə qarşılıqlı səfər olmuşdur. Buna görə də ölkələrimiz arasında münasibətlər və əməkdaşlıq xüsusi xarakter daşıyır. Biz ümid edirik ki, ikitərəfli münasibətlər bundan sonra da möhkəmlənəcək, bütün sahələrdə - iqtisadi, mədəni və təhsil sahələrində əməkdaşlıq durmadan inkişaf edəcəkdir. İki ölkə arasında mədəniyyət və təhsil sahəsində mübadilənin artırılması, o cümlədən tələbələrin İordaniya və Azərbaycan ali məktəblərində təhsilə cəlb edilməsi üçün böyük potensial vardır. Ümid edirik ki, bu sahədə əməkdaşlıq iki ölkə arasında humanitar əlaqələrin möhkəmlənməsinə böyük töhfə verəcəkdir.

Asya Hacızadə

AZƏRTAC-ın xüsusi müxbiri

Əmman