ƏN YAXŞI NƏTİCƏ 7-Cİ YERDİR
Azərbaycanın 3 gimnastı - Aliyə Qarayeva, Anna Qurbanova və Dinara Gimatova Dünya kuboku yarışlarının bu il Kiyevdə keçirilən ilk mərhələsinin bütün finallarında çıxış etmişlər. Azərbaycan Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, onların hamısı final proqramlarında 7-ci yeri tutmuşdur.
7-ci nəticəni A.Qarayeva iplə, D.Gimatova gürzlə, A.Qurbanova isə lentlə göstərmişlər. Bundan əlavə, Aliyə halqa və lentlə final yarışlarında 8-ci yeri tutmuşdur.
Şəxsi birinciliyə gəldikdə isə, A.Qarayeva çoxnövçülükdə 69 gimnast arasında 8-ci, A.Qurbanova 11-ci, D.Gimatova isə 12-ci nəticəni göstərmişlər. Dünya kubokunun sahibi və mükafatçıları isə müvafiq surətdə Ukrayna təmsilçisi Anna Bessonova və rusiyalılar Olqa Kapranova və Yevgeniya Kanayeva olmuşlar.
Ayrı-ayrı növlərdə ən yaxşı nəticəni Bessonova (ip, halqa və lent) və Kapranova (gürz) göstərmişlər.
Mətbuat xidmətindən onu da bildirmişlər ki, bayram həftəsinin axırlarında - martın 24-25-də Fransanın Tye şəhərciyində Qran-pri yarışları silsiləsinin ikinci mərhələsi keçiriləcəkdir. Yarışlarda ölkəmizi cəmi bir gimnast təmsil edəcəkdir.
Xatırladaq ki, A.Qarayeva Moskva turnirinin birinci mərhələsində iştirak edərkən milli gimnastikamızın tarixində ilk dəfə Qran-pri çoxnövçülüyündə 3-cü yeri tutmuşdur.
Bölmənin digər xəbərləri
