Ərəb enerji platformasının saytında Azərbaycanın bərpaolunan enerji potensialı barədə məqalə yayımlanıb
Qahirə, 10 oktyabr, AZƏRTAC
Ərəb ölkələrinin vahid “Attaqa” enerji platformasının saytında ABŞ-ın Xəzər hövzəsində enerji diplomatiyası üzrə baş məsləhətçisi, professor Umut Şükrünün Azərbaycanın bərpaolunan enerji potensialı haqqında analitik məqaləsi yayımlanıb.
AZƏRTAC xəbər verir ki, məqalədə qlobal miqyasda 25 neft-qaz istehsalçısı sırasında yer alan Azərbaycanın Xəzər dənizindəki karbohidrogen ehtiyatları və Avropa, Türkiyə və İsrailə qaz və neft ixracı ilə tanınmasına baxmayaraq, alternativ bərpaolunan enerji mənbələrinə - külək və günəş enerjisinə böyük əhəmiyyət verdiyi diqqətə çatdırılıb. Müəllif qeyd edib ki, bu sahədə 400 milyon dollar dəyərində müqavilələr imzalanıb, Beynəlxalq Bərpa Olunan Enerji Agentliyi isə Azərbaycanın bol dayanıqlı enerji resurslarına malik olduğunu bildirib. Bu resurslar günəş və külək enerjisi ilə yanaşı, hidroelektrik, geotermal və biokütlə seçimlərinə qədər zəngin bir potensialı ehtiva edir. Bu ölkə 2030-cu ilə qədər elektrik enerjisi istehsalının 30 faizini bərpaolunan enerji mənbələri hesabına həyata keçirmək niyyətindədir.
Məqalədə qeyd olunub ki, ötən ilin mayında Azərbaycan ilə Yaponiyanın “Tepsco” şirkəti arasında işğaldan azad edilmiş ərazilərdə “yaşıl enerji” zonalarının yaradılmasına dair Saziş imzalanıb. Azərbaycanda iqtisadi cəhətdən səmərəli və istifadə edilə bilən bərpaolunan enerji mənbələrinin potensialı 27 min meqavat təşkil edir. Bunun 3000 meqavatı külək, 23 min meqavatı günəş enerjisi, 380 meqavatı potensial bioenerji və 520 meqavatı hidroenerjidir. Abşeron yarımadasında yerləşən və “küləklər şəhəri” adlandırılan Bakının həm günəş, həm də külək enerjisi üçün böyük imkanları var.
Müəllif yazıb ki, Azərbaycanın əlverişli coğrafi mövqeyi və iqlimi alternativ enerji mənbələrindən istifadəyə geniş imkanlar yaradır, hazırda bu istiqamətdə genişmiqyaslı işlər aparılır və müsbət nəticələr verilir. Statistika göstərir ki, bu sahədə müsbət dinamika var və tezliklə alternativ enerji mənbələri ölkənin enerji təminatında mühüm rol oynayacaq.
Yazıda Səudiyyə Ərəbistanının “ACWA Power” şirkəti ilə 240 meqavat gücündə Xızı-Abşeron külək elektrik stansiyasının təməlinin qoyulması, 240 meqavat gücündə külək stansiyasının yeni müstəqil enerji layihəsi olması diqqətə çatdırılıb. Bununla yanaşı, BƏƏ-nin “Masdar” şirkəti tərəfindən 230 meqavat gücündə Qaradağ günəş elektrik stansiyasının təməlqoyma mərasimi də keçirilib. Azərbaycan Prezidenti İlham Əliyevin sözlərinə görə, dünyanın aparıcı enerji şirkətləri bu sahədə Azərbaycanla əməkdaşlıqda maraqlıdır. Bütün bu layihələrin reallaşması karbon qazı emissiyasını da xeyli azaldacaq.
Məqalədə vurğulanıb ki, Azərbaycan Qarabağ regionunda bərpaolunan enerji layihələrinə sərmayə yatıra bilər.
Neft və qazın qiymətinin artması fonunda Bakının “Vision 2030” planı çərçivəsində bərpaolunan enerji sahəsində qarşıya qoyduğu məqsədlərə nail olacağı gözlənilir. Azərbaycanın ərəb və Qərb ölkələri ilə yaxşı münasibətləri, həmçinin sərmayələr üçün yaradılan münbit şərait bu sahədə xarici investisiyaların axınına səbəb olacaq.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
