Bakı, 13 iyul, AZƏRTAC

Bu ilin altı ayının sosial-iqtisadi yekunlarına həsr olunmuş müşavirədə Prezident İlham Əliyevin çıxışında göstərdiyi əsas istiqamətlər bir çox sahələri özündə birləşdirir və ölkənin sosial-iqtisadi, xalqın rifah halının, dövlətin təhlükəsizliyinin təmin olunmasına xidmət edir. COVID-19 pandemiyasının törətdiyi qlobal bəlaya, ölkəmizin müharibədən yeni çıxmasına və regionumuzda baş verən müharibələrə baxmayaraq, iqtisadiyyatda, əsasən də qeyri-neft sənayesində və sektorunda inkişaf təmin olunub.

Bu sözləri AZƏRTAC-a açıqlamasında Ana Vətən Partiyası sədrinin müavini politoloq Yalçın Hacızadə söyləyib.

O deyib ki, beynəlxalq əhəmiyyətli layihələrin həyata keçirilməsi, işğaldan azad olunmuş ərazilərdə yenidənqurma və bərpa işlərinin sürətlə aparılması, Böyük Qayıdış Proqramının icrası və digər istiqamətlərdə də həyata keçirilən uğurlu, vətəndaşların rifahına yönəlik siyasət qarşıya qoyulmuş məqsədlərə nail olunduğunu göstərir. Heç şübhəsiz ki, bütün bunlar ölkəmizdə dayanıqlı inkişafın təmin edilməsi sayəsində mümkün olur.

Dövlətimizin başçısının müşavirədə vurğuladığı məsələlərdən birinin də Ermənistanla aparılan sülh danışıqları olduğunu diqqətə çatdıran Y.Hacızadə qeyd edib: “Bilirik ki, bu görüşlər müxtəlif platformalarda gedir və burada müzakirələr əsasən Azərbaycanın şərtləri əsasında aparılır. Regionda münaqişənin davam etməsini istəyən Fransa və digər təxribatçı qüvvələrin olmasına baxmayaraq, Avropa İttifaqı və ABŞ Azərbaycanın yaratdığı yeni reallığı qəbul edərək, sülh danışıqlarında irəliləyişin olmasına çalışır. Danışıqlar prosesində Ermənistan Qarabağ və anklav kəndlər daxil olmaqla Azərbaycanın ərazi bütövlüyünü, suverenliyini tanıyıb və sərhədlərini qəbul edib. Əlbəttə ki, bu, “Dəmir yumruğ"un və Prezident İlham Əliyevin siyasi iradəsinin nəticəsində mümkün olub. Ermənistan və beynəlxalq güclər görürlər ki, Azərbaycan bu istiqamətdə qarşısına qoyduğu və əvvəldən də bəyan etdiyi məqsədlərindən geri çəkilmir. Azərbaycan müxtəlif bəhanələrlə təxribatlar törətmək istəyən qüvvələrə layiqli cavab verərək, sülhə məcburetmə siyasətini davam etdirir”.

Politoloq vurğulayıb ki, dünya müasir olsa da, qaydaları köhnədir. Mütəmadi olaraq üzdə beynəlxalq hüquqa istinad olunsa da, problemlər, məsələlər daha çox güclə həll olunur. Prezident İlham Əliyev müxtəlif çıxışlarında bu məsələyə vurğu edərək bildirib ki, “bugünkü dünyada güc amili ön plana çıxır. Əfsuslar olsun ki, beynəlxalq hüquq çalışmır”. Azərbaycan da Ermənistanla 30 ilə yaxın davam edən danışıqlara, beynəlxalq təşkilatların qərarlarına baxmayaraq, öz ərazilərini güc yolu ilə azad etdi. Bunu və “sülh istəyirsənsə, müharibəyə hazır ol” tezisini əsas götürərək ordu quruculuğu prosesi də sürətlə aparılır.

Qələbədən sonra Ali Baş Komandanın müəyyənləşdirdiyi kimi, müxtəlif təyinatlı yeni hərbi hissələr yaradılır, son nəsil müasir silahlar alınır. Hərbi və müxtəlif istiqamətlərdə digər ölkələrlə əlaqələr qurulur və ya daha da inkişaf etdirilir.

“Dövləti idarə edən Lider və ona inam, güclü ordu, iqtisadi-sosial sabitlik, xalqın birliyi və beynəlxalq müstəvidə ölkələrlə və təşkilatlarla düzgün əlaqələrin qurulması kimi vacib şərtlər bizdə olduğuna görə dövlətimizin inkişafı davam edəcək. Azərbaycana qarşı olan təxribatların da qarşısı qətiyyətlə alınacaq”, - deyə Y.Hacızadə bildirib.