Ermənistan XİN-də Azərbaycan ilə sülh sazişi müzakirə olunub
Tbilisi, 7 fevral, AZƏRTAC
Ermənistan 2025-ci il ərzində sülh gündəliyinə davam edərək, Ermənistan və Azərbaycan arasında sülhün bərqərar olması, möhkəmləndirilməsi və təsisatlaşdırılması istiqamətində fəal şəkildə çalışıb.
AZƏRTAC Ermənistan mətbuatına istinadla xəbər verir ki, bu fikirlər Baş nazir Nikol Paşinyanın sədrliyi ilə Xarici İşlər Nazirliyində qurumun 2025-ci ildəki fəaliyyəti ilə bağlı hesabatın müzakirəsi zamanı səslənib.
İclasda sülh prosesində qeydə alınan ən vacib inkişaf məqamları, o cümlədən sülh müqaviləsinin mətninin razılaşdırılması və paraflanması, ümumilikdə Vaşinqton razılaşmaları, etimadın gücləndirilməsinə yönəlmiş addımlar və təşəbbüslər, Türkiyə ilə münasibətlərin normallaşdırılmasının intensiv prosesi, inkişaflar və gözləntilər müzakirə edilib.
Müzakirə zamanı regional inkişaf və digər iki qonşu - Gürcüstan və İranla strateji tərəfdaşlığın inkişaf etdirilməsi məsələləri müzakirə olunub. İkitərəfli gündəlikdəki əsas məsələlər və regional məsələlər müzakirə olunub.
Qeyd edilib ki, Ermənistan Respublikası Rusiya Federasiyası ilə qarşılıqlı hörmət və suverenliyə hörmət əsasında dostluq münasibətlərini inkişaf etdirməyə çalışır.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
