Kanadadakı soydaşlarımızın adaptasiyası məsələsi ilə bağlı təkliflər səsləndirilib
Bakı, 6 fevral, AZƏRTAC
Kanadada fəaliyyət göstərən Toronto Azərbaycan Evi soydaşlarımızın şəbəkələşməsinə, Vətəndən uzaqda özlərini yalnız hiss etməməsinə və gənc nəsildə milli birliyin formalaşmasına xüsusi xidmət edir.
AZƏRTAC-a Diasporla İş üzrə Dövlət Komitəsindən verilən məlumata görə, Komitə sədrinin müavini Vaqif Seyidbəyovun Kanadaya işgüzar səfəri çərçivəsində Toronto Azərbaycan Evinin fəaliyyəti ilə yaxından tanışlıq olub.
Azərbaycan Evinin və “Vətən” Azərbaycan İncəsənət və Mədəniyyət Mərkəzinin rəhbəri Lalin Həsənova evin fəaliyyəti və qarşıdakı planlar barədə məlumat verib.
Azərbaycan Evinin nəzdində fəaliyyət göstərən “Mənim Azərbaycanım” həftəsonu məktəbini ziyarət zamanı şagirdlər ana dilini öyrəndiklərini, festivallarda və tədbirlərdə Azərbaycanın milli rəqsləri ilə çıxış etdiklərini qürurla dilə gətiriblər. Məktəbin müəllimləri gənc soydaşlarımızın milli ruhda tərbiyə edilməsi, zəngin mədəniyyətimizin qorunması və təbliğində həftəsonu məktəblərinin əvəzsiz rolundan danışıblar.
Səfər çərçivəsində Kanadadakı Azərbaycan icması ilə də görüş keçirilib. Sədr müavini komitənin dəstəyi ilə dünyanın müxtəlif ölkələrində təşkil olunan genişmiqyaslı layihələrin soydaşlarımızın həmrəyliyinə hesablandığını ifadə edib. Görüş iştirakçıları həmvətənlərimiz arasında güclü bağın qurulması, qarşılıqlı dəstək mexanizmlərinin yaradılması, eləcə də Kanadaya yeni gələn soydaşlarımızın adaptasiyası mövzusunda müxtəlif təkliflər səsləndiriblər.
Toronto Universitetində yerləşən “Tomas Fişer” Nadir Əsərlər Kitabxanası da ziyarət edilib. Kitabxanada Azərbaycan dilində əsərlər, eləcə də Nizami Gəncəvinin 1517-ci ilə aid “İqbalnamə” əlyazması, Füzulinin “Leyli və Məcnun” əsərinin Təbrizdə çap olunan ilk nəşri və XVIII əsrə aid təzhibli Qurani-Kərim nüsxələri ilə tanış olub. Toronto Universitetinin Yaxın və Orta Şərq, eləcə də İslam dünyası kitab kolleksiyalarına nəzarət edən Lalə Cavanşir Toronto Universitetində mühafizə edilən Azərbaycan mədəni irsi barədə məlumat verib.
Bölmənin digər xəbərləri
