“FİNCA-AZƏRBAYCAN” QEYRİ-BANK KREDİT TƏŞKİLATI MÜŞTƏRİLƏRİNİN SAYINI 80 MİN NƏFƏRƏ ÇATDIRMIŞDIR
AZƏRTAC xəbər verir ki, Beynəlxalq Mətbuat Mərkəzində “FİNCA-Azərbaycan” qeyri-bank kredit təşkilatı “10 il birlikdə” yubiley kampaniyası çərçivəsində yeni veb saytının www.fincaazerbaijan.com açılışı və fəal müştərilərinin sayının 80 minə çatması ilə bağlı mətbuat konfransı keçirmişdir.
“FİNCA-Azərbaycan” təşkilatının ölkəmiz üzrə direktoru Ceff Flauers bildirmişdir ki, təmsil etdiyi qurum 55 milyon dollar kredit portfeli ilə müştərilərinin sayını 80 min nəfərə çatdırmışdır. “FİNCA-Azərbaycan” dünyanın 22 ölkəsində fəaliyyət göstərən “FİNCA İnternational” təşkilatları arasında liderdir. Mikro-maliyyə İnformasiya Mübadiləsi Korporasiyasının tərtib etdiyi ümumdünya təşkilatları üzrə cədvəlində “FİNCA-Azərbaycan” ilk 100 mikro-maliyyə təşkilatları sırasındadır.
Ceff Flauers vurğulamışdır ki, 1998-ci ildə yaranan bu qurumun Azərbaycanın 55 bölgəsində 23 filialı və 30 ofisi vardır. Bu təşkilatda 653 nəfər çalışır. “FİNCA-Azərbaycan”ın missiyası yeni iş yerləri yaratmaq və maddi rifahlarını yaxşılaşdırmaq məqsədi ilə aztəminatlı adamlara maliyyə xidmətləri təklif edir. Qurum Azərbaycan Respublikası Milli Bankının məhdud lisenziyası əsasında fəaliyyət göstərir.
Bölmənin digər xəbərləri
