FÖVQƏLADƏ HALLAR NAZİRLİYİ SUMQAYITDA ŞƏRTİ ŞƏRAİT ÜZRƏ XÜSUSİ TAKTİKİ TƏLİM KEÇMİŞDİR
Fövqəladə hallar naziri, general-polkovnik Kəmaləddin Heydərov Sumqayıtda fəaliyyət göstərən müəssisə, şirkət və təşkilatların nümayiş etdirdikləri texniki avadanlığa və onların əməkdaşlarından ibarət qəza-xilasetmə dəstələrinə baxış keçirmişdir. Nazir təlimlə əlaqədar zavod ərazisində əsgər və zabit heyəti üçün qurulmuş yaşayış çadırları, səyyar hospital, yeməkxana, qərargah və komanda idarəetmə məntəqəsi ilə tanış olmuşdur.
Mülki Müdafiə Qoşunlarının (MMQ) komandanı Etibar Hüseynov təlimlərin elektron versiyasının təqdimatını keçirdikdən sonra şərti zəlzələ nəticəsində uçqunlar altında qalmış insanların xilas edilməsi üçün MMQ-nin yanğından mühafizə idarəsinin və zavodun qəza-xilasetmə dəstələri xilasetmə əməliyyatlarına başlamışlar.
Sonra zavod ərazisində baş vermiş şərti terror aktının nəticələri aradan qaldırılmışdır. Bununla əlaqədar xüsusi təyinatlı qrup uçqunlar olan sexə daxil olaraq təxribat qrupunu zərərsizləşdirmişdir. Pirotexnik avtomobilinin və onun heyətinin köməyi ilə terror qrupunun sexin içərisində qoyduğu partlayıcı maddə tapılmış və zərərsizləşdirilmişdir. Bu mərhələdə ərazidə güclü kimyəvi təsirə malik zəhərli maddələrin olmasını müəyyən etmək məqsədi ilə kəşfiyyat qrupu xüsusi cihazlar vasitəsilə axtarış aparmış, radiostansiya vasitəsilə təlim rəhbərinə məruzə etmişdir.
Xilasedicilər fədakarlıq, cəsurluq və peşəkarlıq göstərərək yuxarı mərtəbələrdən yaralıların, həlak olanların və sağ qalanların təxliyəsini həyata keçirmişlər.
Fövqəladə hallar naziri, general-polkovnik Kəmaləddin Heydərov təlimin yüksək səviyyədə keçdiyini, qarşıya qoyulan məqsədə nail olunduğunu bildirmişdir. Nazir demişdir ki, bu təlimin materialları gələcəkdə təhsil ocaqlarında, sənaye müəssisələrində, ümumilikdə, əhalinin maarifləndirilməsi işində faydalı vəsait olacaqdır.
K.Heydərov Sumqayıtdakı kimya müəssisələrinin mülki müdafiə qərargahlarının işini də təqdir etmiş, şəhərdə mülki müdafiə məsələlərinin qanunauyğun həyata keçirildiyini demişdir.
Təlimin gedişini FHN ilə yanaşı, hüquq mühafizə orqanlarının, Səhiyyə Nazirliyinin, “Azəriqaz”, “Azərsu” səhmdar cəmiyyətlərinin rəhbər şəxsləri və yerli müəssisələrin əməkdaşları izləmişlər.
