FRANKFURTDA 56-CI BEYNƏLXALQ KİTAB YARMARKASI AÇILMIŞDIR
Builki yarmarka “Ərəb dünyası – gələcəyə baxış” devizi ilə keçirilir. Odur ki, tədbirdə Ərəb Dövlətləri Birliyinin üzvü olan 22 ölkədən 17-si iştirak edir. Onlar yazıçı, şair və incəsənət xadimlərinin iştirakı ilə 200 ədəbi görüş, qiraət, müzakirə keçirəcəklər.
AFR kansleri Gerhard Şröder yarmarkanı açaraq, Qərb ölkələrini İslam mədəniyyətinə hörmətlə yanaşmağa çağırmışdır. O demişdir: “Ötən illər ərzində törədilən terror aktları Qərb ölkələrində İslam mədəniyyətinin düzgün başa düşülməməsinə və hətta onun qarşısında vahimə yaranmasına gətirib çıxarmışdır. Terrorizmlə mübarizə mədəniyyətlərin münaqişəsinə çevrilməməlidir, əksinə, müxtəlif mədəniyyətlərə mənsub ölkələr terrorizmlə mübarizədə birləşməlidir”.
Almaniya hökumətinin başçısı vurğulamışdır ki, Qərb dövlətləri və ərəb ölkələri bir-birlərini başa düşməli və onların arasını vurmağa can atanlara qarşı qətiyyətlə mübarizə aparmalıdır.
Ərəb Dövlətləri Birliyinin Baş katibi Əmr Musa açılış mərasimində bildirmişdir ki, heç kimin öz dəyərlərini başqalarına qəbul etdirməyə haqqı yoxdur. Əksinə, bütün xalqların mədəni dəyərləri bir-birini zənginləşdirməlidir. O, ərəb və Qərb ölkələrini “şər qüvvələr”ə qarşı birlikdə mübarizə aparmağa çağırmışdır.
Frankfurt kitab yarmarkası oktyabrın 10-dək davam edəcəkdir.
Bölmənin digər xəbərləri
