FRANSANIN ALİ MƏKTƏBLƏRİNDƏ TƏHSİL ALMAQ ÜÇÜN MÜSABİQƏ KEÇİRİLƏCƏKDİR
Təhsil Nazirliyindən AZƏRTAC-a bildirmişlər ki, Nazirlər Kabinetinin 2008-ci il 3 iyun tarixli qərarı ilə təsdiq edilmiş “Xarici ölkələrdə təhsil alacaq Azərbaycan gənclərinin seçim qaydaları”na uyğun olaraq, Fransanın ali məktəblərində təhsil almaq üçün müsabiqə keçiriləcəkdir.
Bakalavr pilləsində təhsil almaq üçün müsabiqədə Azərbaycanın ali məktəblərinin bakalavr pilləsində təhsil alan və 2008-ci il sentyabrın 1-dək 18 yaşı tamam olmuş, bakalavr pilləsinə tələbə qəbulu üzrə aparılan test imtahanları çərçivəsində texniki sahələr üzrə ən azı 550 bal, digər sahələr üzrə ən azı 600 bal toplayan tələbələr, habelə prioritet ixtisaslar üzrə müvafiq qaydada təsdiq olunmuş xarici ali təhsil müəssisələrinə özləri daxil olan Azərbaycan vətəndaşları iştirak edəcəklər.
Magistratura pilləsində təhsil almaq üçün müsabiqədə 2007-2008 və 2008-2009-cu tədris illəri üçün Azərbaycanın ali məktəblərinin magistratura pilləsinə qəbul imtahanlarında texniki sahələr üzrə ən azı 70 bal, digər sahələr üzrə ən azı 80 bal toplayanlar, habelə prioritet ixtisaslar üzrə müvafiq qaydada təsdiq olunmuş xarici ali təhsil müəssisələrinə özləri daxil olan Azərbaycan vətəndaşları iştirak edəcəklər.
Bölmənin digər xəbərləri
