Fransaya daxil olan hansı şəxslərə karantin tətbiq olunacaq?
Paris, 4 may, AZƏRTAC
Fransaya milliyyətindən asılı olmayaraq - Avropa İttifaqı, Şengen zonası və ya Böyük Britaniyadan gələnlərin hər birinə karantin rejimi tətbiq olunmayacaq.
AZƏRTAC xəbər verir ki, bu haqda mayın 3-də axşam Yelisey sarayı məlumat yayıb.
Mayın 2-də Fransa Səhiyyə naziri Olivye Veran da fövqəladə sanitar vəziyyətin uzadılması ilə bağlı çıxışında bu məsələyə toxunub. Qeyd edib ki, fövqəladə sanitar vəziyyətin uzadılmasına dair qanun layihəsində nəzərdə tutulan karantin tədbirləri Fransanın milli, eləcə də dəniz aşırı ərazilərinə daxil olacaq hər kəsə şamil ediləcək.
Səhiyyə naziri diqqətə çatdırıb ki, elm nümayəndələrinin təklifinə əsaslanan fərmanla ölkə ərazisinə daxil olma, eləcə də bu zaman tətbiq ediləcək tibbi nəzarətə dair şərtlər tezliklə təqdim olunacaq. Bildirib ki, karantin COVID-19 virusunun əlamətləri olmayan şəxslərə tətbiq edilməyəcək. Virusun əlamətləri olan şəxslər isə məcburi təcrid olunacaqlar. Qarşıdan gələn günlərdə buna dair daha müfəssəl məlumatlar veriləcək.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
