Gələn aydan əmək yarmarkalarının keçirilməsinə başlanılacaq
Bakı, 2 aprel, AZƏRTAC
Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti tərəfindən mayda 2019-cu il üzrə əmək yarmarkalarına başlanılacaq.
Nazirliyin ictimaiyyətlə əlaqələr və kommunikasiya şöbəsindən AZƏRTAC-a verilən məlumata görə, yarmarkaların respublikamızın 56 şəhər və rayonunda təşkili nəzərdə tutulur və həmin aktiv məşğulluq tədbirlərində idarə, müəssisə və təşkilatlarda olan vakant (boş) iş yerləri işsiz və işaxtaran vətəndaşlara təklif olunacaq.
Onlara peşə və ixtisaslarına, əmək bacarıqlarına uyğun vakant iş yerlərinə göndərişlər veriləcək. Peşə və ixtisası olmayan, yaxud peşə bacarığına uyğun iş tapmaqda çətinlik çəkənlər peşə hazırlığı və əlavə təhsil kurslarına cəlb olunacaq. Həmçinin iştirakçıların arzularına uyğun olaraq onların ödənişli ictimai işlərə, müvafiq potensialı olanların isə özünüməşğulluq proqramına cəlb edilməsi üçün qeydiyyatı aparılacaq.
İlk yarmarkaların Naftalan şəhərində, Qəbələ və İsmayıllı rayonlarında keçirilməsi nəzərdə tutulub.
Bölmənin digər xəbərləri
