ELM VƏ TƏHSİL
Gənc alim: Yeni dövrdə qarşıya qoyulan hədəflərin reallaşdırılması bizi Prezidentin ətrafında sıx birləşdirir
![Gənc alim: Yeni dövrdə qarşıya qoyulan hədəflərin reallaşdırılması bizi Prezidentin ətrafında sıx birləşdirir](/files/2024/1/1200x630/1708006869516952232_1200x630.jpg)
Bakı, 15 fevral, AZƏRTAC
Dünyanın geosiyasi baxımdan ən önəmli regionlarından biri ölkəmizin də yerləşdiyi Cənubi Qafqaz regionudur. Son illərdə isə dünyada baş verən mühüm siyasi hadisələr kontekstində bu regionun önəmi daha da artır. Bundan əlavə, biz artıq Cənubi Qafqaz regionunda yeni bir mərhələnin başlandığını görürük. Əsası qoyulan bu yeni mərhələ regionun geosiyasətinə və geoiqtisadiyyatına mühüm töhfələr verəcək.
Bu fikirləri AZƏRTAC-a açıqlamasında AMEA Qafqazşünaslıq İnstitutunun Gənc Alimlər və Mütəxəssislər Şurasının üzvü Zeynəb Allahverdiyeva söyləyib. O bildirib ki, cənubi Qafqazda 30 ildən bəri Ermənistan tərəfindən davam etdirilən işğalçılıq siyasəti regionun geoiqtisadi, geostrateji inkişafını ləngidən əsas amil olub. Məhz bu amil regionu həm də böyük güclərin maraqlarının girovuna çevirmişdi. İndi isə Cənubi Qafqazın əsas problemi həll edilib. Zeynəb Allahverdiyeva qeyd edib ki, Vətən müharibəsində məhz Prezident, ordu, xalq birliyi ölkəmizi qələbəyə apardı. Azərbaycan xalqı İlham Əliyevin rəhbərliyi altında sıx birləşdi və bir yumruğa çevrildi. Bu yumruq isə Azərbaycan dövlətinə Zəfər gətirdi. Ölkəmiz Cənubi Qafqazda yeni reallıqlar yaratdı. Bu reallıqlarla təkcə Ermənistan deyil, həm də Cənubi Qafqazda sülhü istəməyən dövlətlər hesablaşmalıdırlar. Təbii ki, yeni reallıqlar yeni yanaşmalar da tələb edir. İlk olaraq isə məğlub tərəf olan, siyasi və hərbi böhran yaşayan Ermənistan öz yanaşmasını dəyişməlidir.
Azərbaycan özünün diqqətlə işləyib hazırladığı hərbi strategiyasını yüksək səviyyədə tərtib edilmiş diplomatik addımlarla birləşdirərək regionda həm çəkindirmə, həm də tarazlıq siyasətinin əsasını qoyub. Belə ki, bu gün Cənubi Qafqazda maraqları olan, hətta regionda sülh mühitinin yaranmasını istəməyən güclər Azərbaycan dövlətinin yaratdığı yeni geosiyasi reallıqlarla üzləşməli olurlar. 2020-ci il 10 noyabr tarixli birgə Bəyanatın imzalanması müharibənin Azərbaycan dövlətinin qələbəsi ilə bitməsinin bir sübutu idi”, - deyə Zeynəb Allahverdiyeva bildirib.
Zeynəb Allahverdiyeva 2023-cü il sentyabrın 19-da 24 saatdan da az müddətdə yekunlaşan lokal xarakterli antiterror tədbirlərinin də öz real nəticəsini verdiyini vurğulayıb. Qeyd edib ki, antiterror tədbirləri zamanı qısa müddət ərzində bütün istiqamətlər üzrə hərbi uğurlar əldə edildi, ordumuz qəhrəmanlıq və peşəkarlıq nümayiş etdirərək düşmənə ağır zərbələr vurdu. Nəticədə Ermənistan silahlı qüvvələrinin qanunsuz hərbi birləşmələri ağ bayraq qaldıraraq təslim oldular. Bununla da Azərbaycan Ordusu bütün Qarabağ torpaqlarında tam nəzarəti bərpa etdi. Lokal xarakterli antiterror tədbirlərindən qısa zaman sonra bir çox erməni separatçıları və cinayətkarları da həbs edildi. 2023-cü ilin oktyabr ayının 15-də Müzəffər Ali Baş Komandan İlham Əliyev Xocalı, Xankəndi və Xocavənd şəhərlərində, Sərsəng su anbarının ərazisində, Xocalı rayonunun Əsgəran qəsəbəsində Azərbaycanın Dövlət Bayrağını ucaltdı. Beləlikə də Azərbaycan öz suverenliyini tam şəkildə bərpa etdi.
“Bu gün biz böyük qürur hissi ilə qeyd edə bilərik ki, Azərbaycan dövləti əsas milli marağı olan ərazi bütövlüyünü tam təmin edib.
Fevralın 14-də Prezident İlham Əliyev Milli Məclisdə andiçmə mərasimindəki çıxışında bir daha qeyd edib ki, əgər bizə qarşı ərazi iddialarına son qoyulmazsa, əgər Ermənistan öz qanunvericiliyini normal qaydaya salmazsa, təbii ki, sülh müqaviləsi olmayacaq. Bu, bir daha onu deməyə əsas verir ki, ordu quruculuğu, hərbi potensialın gücləndirilməsi əsas vəzifədir.
Beləliklə, son 20 ildə Azərbaycan Respublikasının Prezidenti İlham Əliyev ölkəmizin siyasi maraqlarını tam şəkildə təmin etdi. Bu gün artıq Cənubi Qafqaz regionunda hər baxımdan güclü, ərazi bütövlüyünü tam bərpa etmiş bir Azərbaycan dövləti var. Məhz buna görə biz artıq ölkəmizdə yeni bir dövrün başlandığını deyə bilərik. Prezidentin də qeyd etdiyi kimi, yeni dövrün isə yeni hədəfləri olmalıdır. Yeni dövrün və yeni missiyanın əsas hədəfləri isə işğaldan azad olunmuş ərazilərdə quruculuq işlərini sürətləndirmək və həmin yaşayış məntəqələrinə keçmiş məcburi köçkünlərin Böyük Qayıdışını təmin etməkdir. Prezident İlham Əliyevin uğurlu siyasətinin nəticəsidir ki, görülən işlər dövlətimizin qüdrətlənməsinə, vətəndaşlarımızın rifahının yüksəlməsinə xidmət edir. Bütün bu qarşıya qoyulan hədəflərin reallaşdırılması bizi Prezident İlham Əliyevin ətrafında sıx birləşdirir”, - deyə Zeynəb Allahverdiyeva fikrini yekunlaşdırıb.