ELM VƏ TƏHSİL
Gənc alimlərin üçüncü respublika innovativ ideya yarmarkasının açılışı olmuşdur
Bakı, 16 sentyabr (AZƏRTAC). Sentyabrın 16-da “Hilton-Baku” otelində Gənclər və İdman Nazirliyinin dəstəyi, Azərbaycan Gənc Alim, Aspirant və Magistrlər Cəmiyyətinin, Azərbaycan Milli Elmlər Akademiyasının (AMEA) Gənclərin İntellektual İnkişaf Mərkəzinin birgə təşkilatçılığı ilə gənc alimlərin üçüncü respublika innovativ ideya yarmarkasının açılışı olmuşdur.
AZƏRTAC xəbər verir ki, tədbirdə Azərbaycan Gənc Alim, Aspirant və Magistrlər Cəmiyyətinin sədri İlqar Orucov gənc alimlərin üçüncü respublika innovativ ideya yarmarkasının açılışı münasibətilə iştirakçıları təbrik etmiş, tədbirin keçirilməsində göstərdiyi dəstəyə görə Gənclər və İdman Nazirliyinə minnətdarlığını bildirmişdir. O, artıq üçüncü dəfədir reallaşdırılan tədbirin Prezident İlham Əliyevin 2011-ci il 7 iyul tarixli Sərəncamı ilə təsdiq olunmuş “Azərbaycan gəncliyi 2011-2015-ci illərdə” Dövlət Proqramı”na uyğun olaraq keçirildiyini qeyd etmişdir.
Nəzərə çarpdırmışdır ki, builki tədbirdə ölkəmizin müxtəlif elm və ali təhsil müəssisələrindən 203 gənc alim və tədqiqatçı iştirak edir. Dövlətimiz daim istedadlı gənclərə dayaq olmuş, onların fəaliyyətini dəstəkləmişdir.
Natiq son illər ölkəmizdə dövlətimizin başçısı tərəfindən elm və təhsil, gənclər siyasəti haqqında imzalanmış müxtəlif fərman və sərəncamların gənc alimlərin qarşısında böyük vəzifələr qoyduğunu bildirmişdir. Bu gün gənc alim və tədqiqatçılar, doktorantlarımız Gənclər və İdman Nazirliyinin dəstəyi ilə bir sıra xarici ölkələrə ezamiyyətə göndərilir, müxtəlif beynəlxalq konfrans və simpoziumlarda uğurla iştirak edirlər.
Beş gün davam edəcək tədbir çərçivəsində “Davamlı innovativ inkişafın elmi-strateji əsasları gənc alimlərin tədqiqatlarında”, “Elmi gəncliyə sərmayə - gələcəyə sərmayə: gənc alimlərin yeni elmi - innovativ işlərinin təqdimatları”, “Azərbaycan elmində innovativ inkişafın müasir göstəriciləri - gənc alimlərin baxışları”, “Humanitar elmlərdə innovasiya” mövzularında konfrans, seminar, elmi - innovativ işlərin təqdimatları keçiriləcəkdir.
Tədbirdə gənclər və idman nazirinin müavini İntiqam Babayev ölkəmizdə elmin inkişafı üzrə dövlət siyasətindən, bu sahədə əldə olunmuş nailiyyətlərdən, gənc alimlərə göstərilən diqqət və qayğıdan söhbət açmışdır.
Bildirmişdir ki, Azərbaycan gəncliyi daim dövlətin diqqət mərkəzindədir. Gənclərin hərtərəfli inkişafı ölkənin sosial, siyasi, mənəvi inkişafının tərkib hissəsidir və gənclərin Azərbaycanın inkişafında özlərinə layiqli yer tutmaları üçün dövlətimiz əlindən gələni edir. Azərbaycan Respublikasının Prezidenti yanında Elmin İnkişafı Fondunun (EİF) fəaliyyəti və daima zənginləşən müxtəlif formatlı qrant müsabiqələri həmin missiyanın uğurla yerinə yetirilməsinə kömək edir. “Azərbaycan gəncliyi 2011-2015-ci illərdə” Dövlət Proqramı”ı Azərbaycanın dövlətçilik tarixində gənclər siyasəti sahəsində qəbul olunmuş çox mühüm bir sənəddir.
Artıq gənclərlə bağlı layihələrin, müsabiqələrin keçirilməsi ənənə halını almışdır. Sevindirici haldır ki, bu gün gənclərimiz respublikamızın müxtəlif ictimai-siyasi, mədəni həyatında fəal iştirak edir, bir sıra dövlət strukturunda çalışırlar.
Mərasimdə Prezident Administrasiyasının ictimai-siyasi məsələlər şöbəsinin baş məsləhətçisi Vüqar Səlimov çıxış edərək tədbirin əhəmiyyətini qeyd etmişdir. Bildirmişdir ki, bu layihənin reallaşdırılması, müxtəlif təşəbbüslər gəncliyin inkişafına, ölkədə gənclərin innovativ təfəkkür tərzinin formalaşmasına, onların elmi biliklərinin stimullaşdırılmasına yönəlmiş fərqli və müxtəlif addımlardandır. Gənclərin elmi biliklərinin, onların innovativ düşüncə tərzinin formalaşması daim dövlətimizin diqqət mərkəzindədir. Bu sahədə son illər dövlətimiz tərəfindən bir sıra addımlar atılmış, mühüm qərarlar qəbul edilmiş, Azərbaycan Respublikasının Prezidenti yanında Elmin İnkişafı Fondu, Gənclər və İdman Nazirliyi, Azərbaycan Respublikasının Prezidenti yanında Gənclər Fondu yaradılmışdır. Ümidvaram ki, gənc alimlərimiz innovativ təfəkkürlərinin formalaşmasında, elmi biliklərinin daha da zənginləşməsində bu cür layihələrdən daha səmərəli istifadə edəcəklər.
Sonda V. Səlimov gənc alimlərin üçüncü respublika innovativ ideya yarmarkasının işinə uğurlar arzulamış və iştirakçıları təbrik etmişdir.
Tədbirdə AMEA Geologiya İnstitutunun doktorantı Fuad Əliyev gənc alimlərə göstərilən diqqət və qayğıya görə minnətdarlığını bildirmişdir.
Sentyabrın 20-dək davam edəcək layihəyə gənc alimlərin 200-dən artıq tezisi təqdim olunmuşdur.