Gənc könüllü: Könüllülük böyük təcrübə, yeni insanlarla tanışlıq, ünsiyyət və özünə inam deməkdir
Bakı, 3 fevral, AZƏRTAC
Gələn ay könüllük hərəkatına qoşulmağımın bir ili tamam olacaq. Mən öz arzumla bu hərəkata qoşulmuşam. Hesab edirəm ki, cəmiyyətə inteqrasiya olunmaqda, sosiallaşmaqda hərəkatın müstəsna əhəmiyyəti var.
AZƏRTAC xəbər verir ki, bu sözləri Dövlət İdarəçilik Akademiyasının beynəlxalq münasibətlər fakültəsinin dördüncü kurs tələbəsi Rafiq İbrahimov deyib.
“Hərəkata qoşulduğum müddətdə Xarici İşlər Nazirliyinin keçirdiyi bir sıra tədbirlərdə iştirak etmişəm. Ötən ilin payızında Bakıda keçirilən iki böyük tədbirdə - Qoşulmama Hərəkatının, Türkdilli Dövlətlərin Əməkdaşlıq Şurasının zirvə toplantılarında könüllülük fəaliyyəti ilə məşğul olmuşam. Bundan başqa ağacəkmə aksiyalarında, iməciliklərdə, habelə intellektual viktorina və yarışlarda fəal iştirak etmişəm. Ötən həftənin axırlarında Ekologiya və Təbii Sərvətlər Nazirliyində müxtəlif qurumlarda fəaliyyət göstərən könüllülərin iştirakı ilə keçirilən bilik yarışının iştirakçısı olmuşam”,- deyə gələcək diplomat bildirib.
Onun dediyinə görə, könüllülük böyük təcrübə, yeni insanlarla tanışlıq, ünsiyyət və özünə inam deməkdir. Gənclər üçün belə imkanlar yaratdığına görə bu hərəkata qoşulmağa dəyər.
Bölmənin digər xəbərləri
