Gənc Tamaşaçılar Teatrının səhnəsində ilk dəfə “Tənbəl Əhməd” tamaşası oynanılacaq
Bakı, 8 iyun, AZƏRTAC
Azərbaycan Dövlət Gənc Tamaşaçılar Teatrının həftəsonu repertuarı maraqlı tamaşalarla zəngindir.
Teatrdan AZƏRTAC-a bildirilib ki, iyunun 9-da Ş.Perronun “Çəkməli pişik”, iyunun 10-da isə teatrın səhnəsində ilk dəfə “Tənbəl Əhməd” tamaşasının qəhrəmanları məktəblilərin görüşünə gələcək. Axşam seansında iyunun 9-da Füzulinin “Leyli və Məcnun” əsəri əsasında eyniadlı tamaşa, iyunun 10-da isə “Magiya+Şou” adlı əyləncəli musiqili gecə təqdim ediləcək.
Tamaşaçılar tərəfindən hər zaman maraqla qarşılanan səhnə əsərlərində rolları Əməkdar artistlər Elşən Rüstəmov, Nofəl Vəliyev, Nicat Kazımov, Leyli Vəliyeva, Rasim Cəfər, Almaz Mustafayeva, Vahid Əliyev, Nəsibə Eldarova, aktyorlar Günel Məmmədova, Elnur Kərimov, Elnur Hüseynov, Asya Atakişiyeva və başqaları ifa edirlər.
Biletləri bütün mərkəzləşdirilmiş kassalardan, “ASAN xidmət” mərkəzlərindən və filiallarından əldə etmək olar.
Bölmənin digər xəbərləri
