Gəncədə akademik Fuad Əliyevin yubileyi qeyd edilib
Bakı, 31 yanvar, AZƏRTAC
AMEA Gəncə Bölməsinin sədri, Əməkdar elm xadimi, akademik Fuad Əliyev bütün fəaliyyətini elmimizin inkişafına, kadrların hazırlanmasına həsr edib. O, çətin və fundamental elm olan neft kimyası sahəsində 20-dən çox elmi kəşfin, 200-dən artıq kitab və monoqrafiyanın müəllifidir.
Akademiyanın Gəncə Bölməsinin ictimaiyyətlə əlaqələr şöbəsindən AZƏRTAC-a bildirilib ki, görkəmli alimin 70 illik yubileyi şəhər rəhbərliyinin və elmi ictimaiyyətin iştirakı ilə qeyd olunub. Bu münasibətlə keçirilən tədbirdə Gəncə Şəhər İcra Hakimiyyətinin başçısı Niyazi Bayramov, Azərbaycan Dövlət Aqrar Universitetinin rektoru, AMEA-nın müxbir üzvü İbrahim Cəfərov, Gəncə Dövlət Universitetinin rektoru, professor Yusif Yusibov, AMEA-nın Gəncə Bölməsinin İşlər İdarəsinin müdiri Rasim Tağıyev çıxış edərək yubilyarı təbrik edib, onun zəngin elmi və ictimai fəaliyyətindən söhbət açıblar. Diqqətə çatdırılıb ki, Fuad Əliyevin bir çox elmi məqalələri dünyanın nüfuzlu akademik nəşrlərində, jurnallarda dərc edilib. İyirmiyə qədər fəlsəfə və elmlər doktorunun hazırlanması, fundamental tədqiqatlar aparılması və yüksəkixtisaslı mütəxəssislər yetişdirilməsi də onun xidmətləri sırasına daxildir. Fuad Əliyev 1981-ci ildə elmlər namizədi, 1991-ci ildə elmlər doktoru alimlik dərəcəsinə layiq görülüb.
Görkəmli alim gərgin elmi axtarışlar və elmi-təşkilatı işlərlə yanaşı, şəhərin ictimai-siyasi və mədəni həyatında da yaxından iştirak edir. O, Gəncə Ziyalılar Cəmiyyətinin sədri, YAP Gəncə şəhər təşkilatı sədrinin müavini, şəhər icra hakimiyyəti kabinetinin üzvü kimi fəal ictimai iş aparır. Vətənpərvər ziyalı Fuad Əliyevin elmi və ictimai fəaliyyəti yüksək qiymətləndirilib. O, “Tərəqqi” medalına, “Əməkdar elm xadimi” fəxri adına layiq görülüb, 3-cü dərəcəli “Vətənə xidmətə görə” ordeni ilə təltif edilib, dəfələrlə Gəncə Şəhər İcra Hakimiyyətinin və Azərbaycan Milli Elmlər Akademiyası Rəyasət Heyətinin fəxri fərmanlarını alıb.
Yubiley tədbirində çıxış edənlər kiçik bir kollektivlə fəaliyyətə başlayan elmi mərkəzin ötən 40 il ərzində Azərbaycan elminə sanballı töhfələr verən elmi müəssisəyə çevrilməsini Fuad Əliyevin təşkilatçılıq bacarığının nəticəsi kimi dəyərləndirib, Gəncə Bölməsinin genişlənən beynəlxalq əlaqələrini, dünya elminə uğurlu inteqrasiyasını mühüm amil kimi vurğulayıblar.
Akademik Fuad Əliyev elmi və elmi-təşkilatçılıq fəaliyyətinə verilən yüksək qiymətə görə minnətdarlığını bildirib, əldə etdiyi nailiyyətləri ölkə başçısının elmə göstərdiyi diqqət və qayğının nəticəsinin ifadəsi kimi dəyərləndirib.
Yubilyara şəhər icra hakimiyyətinin fəxri fərmanı və qiymətli xatirə hədiyyəsi təqdim olunub.
Bölmənin digər xəbərləri
