GƏNCLƏR, İDMAN VƏ TURİZM NAZİRLİYİNDƏ MƏTBUAT KONFRANSI
Gənclər, idman və turizm naziri Əbülfəz Qarayev aprelin 11-də mətbuat konfransı keçirmişdir. Nazir jurnalistlərə gənclərin 3-cü respublika forumunun gedişi barədə məlumat verərək bildirdi ki, forumun başlandığı vaxtdan rayon və şəhərlərdə 15 mindən artıq tədbir keçirilmişdir. Gənclərin təxminən 1 milyon 200 min təmsilçisinin iştirak etdiyi bu tədbirlərdə zona müşavirələrinə və forumun mayda Bakıda keçiriləcək yekun iclasına nümayəndələr seçilmişdir. Aprelin 15-də forumun gənclərin yaradıcılığına həsr edilmiş növbəti həftəsi başlanacaqdır. Gənc karikaturaçıların sərgiləri, asfalt üzərində ən yaxşı şəkil müsabiqələri keçiriləcək, gənc bəstəkarların konsertləri olacaq, sənətə təzə qədəm qoyan rejissorların filmləri göstəriləcək və bir çox digər tədbirlər təşkil ediləcəkdir.
Nazir idmanın inkişafından və Azərbaycan idmançılarının uğurlarındran söhbət açaraq xatırlatdı ki, bu günlərdə cüdoçularımız Minskdə “A” kateqoriyalı turnirdə 7 medal qazanmışlar, beynəlxalq yarışların dəfələrlə qalibi olan Elçin İsmayılov isə fəxri kürsünün ən yüksək pilləsinə qalxmışdır. Sərbət güləş üzrə Bakıda keçiriləcək Avropa çempionatı mötəbər beynəlxalq yarışlardan biri olacaqdır. İndi ona ciddi hazırlıq görülür. Çempionatda iştirak etmək üçün bu günədək 30 ölkədən sifariş alınmışdır və onlar hələ də gəlməkdədir. “Lider” teleşirkəti bu çempionatı “Avrosport” beynəlxalq telekanalına translyasiya etmək hüququ almışdır. Sentyabrda Bakıda Azərbaycan və İtaliya yığma komandaları arasında Avropa futbol çempionatı qrup turnirinin seçmə görüşü keçiriləcəkdir. Bunun üçün hazırda Tofiq Bəhrəmov adına respublika stadionu yenidən qurulur. Nazir həmçinin bildirdi ki, “York” şirkətinin ekspertlər qrupu indi Bakıdadır və konsert-idman kompleksində məşq üçün buz meydançası yaradılmasının mümkünlüyünü öyrənir.
Əbülfəz Qarayev bu günlər Moskvada keçirilmiş və ilk dəfə olaraq Azərbaycanın da iştirak etdiyi beynəlxalq turizm sərgisindən də danışdı. Sərgi iştirakçıları və tamaşaçılarının stendimizə maraq göstərdiklərini bildirən nazir dedi ki, Azərbaycanda turizm sahəsinin inkişafına dair dövlət proqramı baş nazir tərəfindən təsdiqlənmiş və ölkə Prezidentinə təqdim olunmuşdur. Mayda Bakıda birinci beynəlxalq turizm sərgisi keçiriləcək və bir sıra ölkələrin şirkətləri bu tədbirdə iştirak etmək istədiklərini bildirmişlər. Misilsiz Azərbaycan mətbəxinin təbliği əcnəbi turistlərin ölkəmizə cəlb olunması amillərindən biridir. Nazirlər Kabinetinin qərarı ilə Gənclər, İdman və Turizm Nazirliyinin tabeliyinə verilmiş Milli Kulinariya Mərkəzi əməkdaşlarının səyləri ilə Avstriyada Azərbaycan mətbəxi günləri keçirmək nəzərdə tutulur.
Bölmənin digər xəbərləri
